پاکستان عدل، مساوات اتے رواداری دے اصولاں تے بݨیا، انہاں بنیاداں تے ہمیشہ قائم رہسی، محسن نقوی

اسلام آباد۔11اگست (اے پی پی) وفاقی وزیر داخلہ محسن نقوی آکھیا جو پاکستان اسلام دے سنہری اصولاں عدل، مساوات اتے رواداری تے بݨیا اتے انہاں بنیاداں تے ہمیشہ قائم رہسی۔ پاکستان اقلیتاں دی جان و مال، عقیدے اتے عبادت دی آزادی کوں نہ صرف آئینی ذمیداری سمجھدے بلکہ ریاستی سنڄاݨ وی سمجھدے۔ پاکستان اچ رہݨ آلا ہر شہری بھانویں کہیں وی مذہب دا ہووے، برابر دا پاکستانی اے۔ اقلیتاں دے قومی ݙینھ تے آپݨے سنیہے اچ وزیر داخلہ محسن نقوی آکھیا جو دین اسلام زبردستی دی ممانعت، عقیدے دی آزادی اتے انسانیت دا احترام دا درس ݙیندے اتے ایہا تعلیمات اقلیتاں دی حفاظت دی بنیاد ہن۔ “قائداعظم 11 اگست 1947 دے خطاب اچ واضح کیتا ہا جو پاکستان دا ہر بندہ برابر دی حیثیت رکھیندے۔ پاکستان دا آئین اقلیتاں دے بنیادی حقوق دی ضمانت ݙیندے۔ محسن نقوی آکھیا جو پاکستان دی ساریاں اقلیتاں عزت، مساوات اتے حصے دے نال قومی ترقی اچ شریک ہن اتے قابل فخر ساتھی ہن۔ اقلیتاں تعلیم، صحت، دفاع، سیاست سودھے ہر شعبے اچ مثالی خدمتاں ݙتن جو تعریف دے لائق ہن، اقلیتاں دا کردار پاکستان دے قومی ورثے دا ہک روشن حصہ اے۔ وطن نال محبت، خدمت اتے کردار قومی سنڄاݨ دے معیار ہن، پاکستان اتے پاکستانی کہیں فرق کوں نئیں منیندے۔ انہاں آکھیا جو ریاست ہمیشہ اقلیتاں دی جان و مال اتے مقدس علاقیاں دی حفاظت کوں پہلی ترجیح ݙیندی اے، عبادت گاہاں دی تزئین و آرائش ہووے یا تقریبات دی سکیورٹی، ریاست آپݨی ہمیشہ ذمے واری نبھیندی اے۔ انہاں آکھیا جو جنگ دے حال اچ وی کرتارپور راہداری اتے ننکانہ صاحب کوں کھلا اتے محفوظ رکھݨا، پاکستان دے امن، محبت اتے مذہب دے وچال ہم آہنگی دا عملی ثبوت اے۔ پاکستان اقلیتاں کوں انہاں دا پورا حق ݙیندے کیوں جو او ریاست دے برابر دے وارث ہن، اساݙی پالیسی، نیت اتے عمل ہک ہن، اقلیتاں دی حفاظت، آزادی اتے شراکت داری تے کوئی سمجھوتہ نہ ہوسی۔ اقلیتاں دے قومی ݙینھ تے بطور قوم اقلیتاں دے بنیادی حقوق دی حفاظت دے عہد کوں پکا کریندن۔