چیئرمین سینیٹ سید یوسف رضا گیلانی دا اقلیتاں دے عالمی ݙینھ دے موقع تے سینیٹ اچ اقلیتاں بارے پارلیمانی کاکس بݨاوݨ دا اعلان

اسلام آباد۔11اگست (اے پی پی) چیئرمین سینیٹ سید یوسف رضا گیلانی اقلیتاں دے عالمی ݙینھ دے موقع تے سینیٹ اچ اقلیتاں بارے پارلیمانی کاکس بݨاوݨ دا اعلان کیتے، ایں کاکس اچ قومی اسمبلی دے ممبراں کوں وی نمائندگی ݙتی ویسی جئیں دی نامزدگی سپیکر قومی اسمبلی کریسن۔ چیئرمین سینیٹ سینیٹ اچ اقلیتی برادری توں تعلق رکھݨ آلے سینیٹ دے اراکین ولوں مطالبے تے اے اہم پارلیمانی کاکس بݨاوݨ دا فیصلہ کیتے۔ سینیٹ سیکرٹریٹ توں جاری بیان موجب چیئرمین سینیٹ آپݨے خصوصی سنیہے اچ آکھیا جو زنانیاں اتے اقلیتاں دی فلاح و بہبود ہمیشہ انہاں دی ترجیح اچ شامل رہی اے۔ انہاں آکھیا جو بطور وزیراعظم وی انہاں ہمیشہ ایں ڳالھ کوں یقینی بݨایا جو تریمتیں اتے اقلیتاں کوں قومی ترقی دے مرکزی دھارے اچ شامل کیتا ونڄے اتے انہاں کوں بھرپور نمائندگی ݙتی ونڄے۔ سید یوسف رضا گیلانی آکھیا جو شہید محترمہ بے نظیر بھٹو وی اقلیتاں اتے تریمتیں دی ترقی تے خوشحالی اتے زندگی دے ہر شعبے اچ انہاں دی شمولیت کیتے نمایاں خدمتاں ݙتن۔ انہاں ٻیا آکھیا جو پاکستان پیپلز پارٹی دے چیئرمین بلاول بھٹو زرداری دی وی خواہش اے جو تریمتیں کوں زندگی دے ہر شعبے اچ اڳوں گھن آیا ونڄے، انہاں کوں بااختیار بݨایا ونڄے اتے قومی اداریاں اچ انہاں دی شمولیت کوں یقینی بݨایا ونڄے۔ انہاں آکھیا جو صدر مملکت آصف علی زرداری وی اقلیتاں دے حقوق دی حفاظت اتے انہاں کوں زندگی دے سارے شعبیاں اچ برابر دے موقع ݙیوݨ کیتے پرعزم ہن۔ چیئرمین سینیٹ ملازماں اچ تریمتیں اتے اقلیتاں دے کوٹے اچ ودھارے اتے سینیٹ اچ اقلیتاں کوں چار فیصد نمائندگی ݙیوݨ کیتے کیتی ڳئی کوششاں دا وی ذکر کیتے۔ انہاں آکھیا جو اعلیٰ فیصلہ سازی دے عمل اچ تریمتیں اتے اقلیتاں کوں بھرپور نمائندگی ݙیوݨ انہاں معاشرتی ناانصافیاں دے ازالے اچ مددگار ہوسی۔ چیئرمین سینیٹ ایں ڳالھ کوں تسلیم کیتے جو اقلیتاں ہمیشہ پاکستان دی ترقی، خوشحالی اتے مذہب دے وچال ہم آہنگی کوں ودھارا ݙیوݨ اچ اہم کردار ادا کیتے۔ انہاں آکھیا جو پاکستان ہک بہوں ثقافتاں آلا ملک اے جتھاں ہر زبان، ہر عقیدے اتے ہر ثقافت توں تعلق رکھݨ آلے شہری ملک دی ترقی اتے استحکام اچ بھرپور حصہ پیندے پئن۔