اقلیتاں پاکستان دی ترقی، استحکام اتے قومی یکجہتی کیتے اہم، ہک جامع، مضبوط اتے آپسی احترام آلا پاکستان ٻݨیسوں، صدر آصف علی زرداری دا اقلیتاں دے قومی ݙینھ تے خطاب

اسلام آباد۔11اگست(اے پی پی)صدر مملکت آصف علی زرداری آکھیے جو “اقلیتاں پاکستان دی ترقی، استحکام اتے قومی یکجہتی اچ نمایاں کردار ادا کیتے، قائداعظم محمد علی جناح دا وژن مساوات، رواداری، بھائی چارے اتے مذہبی ہم آہنگی تے مبنی پاکستان دا قیام ہا، اقلیتاں دے قومی ݙینھ 11 اگست 2025 دے موقع تے وزارت مذہبی امور و بین المذاہب ہم آہنگی ولوں ایوان صدر اچ تقریب نال خطاب کریندے صدر مملکت آکھیا جو “اسلام دا سنیہا امن، انصاف، رواداری اتے انسانی وقار دی حفاظت اے، میثاق مدینہ سارے شہریاں کوں برابر دے حقوق ݙیوݨ دی روشن اتے تاریخی مثال اے، آئین پاکستان اقلیتاں دے بنیادی حقوق اتے انہاں دی حفاظت دی پوری ضمانت ݙیندے، اساں ہر قسم دے وانڄھ، انتہا پسندی اتے تشدد کوں مکاوݨ کیتے پرعزم ہیں۔ صدر مملکت آکھیا جو پارلیمنٹ اتے صوبائی اسمبلیاں اچ اقلیتاں کیتے خاص نشستاں انہاں دی سیاسی شمولیت کوں یقینی بݨیندن، سرکاری ملازماں اچ اقلیتاں کیتے 5 فیصد کوٹہ رکھیا ڳئے، اقلیتی طلباء کوں پرائمری توں اُچی تعلیم تئیں سکالرشپس ݙتیاں ویندیاں پین، اقلیتاں دیاں عبادت گاہواں قابضین توں واپس گھن تے اصل منتظمین کوں ݙتیاں ویسن، سارے شہریاں کوں مذہب توں اُتے تھی تے برابر دے موقع ݙتے ویسن۔ صدر مملکت آکھیا جو اساں ہک تھی تے ترقی اتے خوشحالی دی راہ تے ودھسوں۔ اقلیتی رہنماواں 11 اگست کوں قومی اقلیتی ݙینھ قرار ݙیوݨ تے صدر مملکت دا شکریہ ادا کیتا۔ تقریب نال وفاقی وزیر قانون، انصاف و انسانی حقوق اعظم نذیر تارڑ، وزیر مذہبی امور و بین المذاہب ہم آہنگی سردار محمد یوسف سودھا رکن قومی اسمبلی اتے پارسی کمیونٹی دے نمائندے ڈاکٹر اسفندیار بھنڈارا، مسیحی کمیونٹی دے نمائندے ڈاکٹر جوزف ارشد، بہائی کمیونٹی دی نمائندہ ڈاکٹر سیما فرزاد، سکھ کمیونٹی دے نمائندے ڈاکٹر رمیش سنگھ اروڑہ، وزیر مملکت مذہبی امور کیسومل کھیل داس کوہستانی وی خطاب کیتا۔ تقریب دے آخر اچ صدر مملکت آصف علی زرداری اقلیتی اتے مذہبی رہنماواں نال رَل تے اقلیتاں دے قومی ݙینھ دی مناسبت نال کیک وی کٹیا۔ تقریب اچ غیر ملکی سفیر، مختلف مکتب فکراں دے علماء کرام، سیاسی و سماجی شخصیات اتے اقلیتی مذہبی رہنماواں شرکت کیتی۔