صدر مملکت نال وفاقی وزیر مذہبی امور دی ملاقات، اقلیتاں دے حقوق دی حفاظت، مذہبی رواداری کوں ودھاوݨ اتے بین المذاہب ہم آہنگی تے گالھ مہاڑ

اسلام آباد۔12اگست (اے پی پی) صدر مملکت آصف علی زرداری نال وفاقی وزیر مذہبی امور سردار محمد یوسف ایوانِ صدر اچ ملاقات کیتی اتے اقلیتی حقوق دی حفاظت، مذہبی رواداری کوں ودھاوݨ اتے بین المذاہب ہم آہنگی تے تفصیلی گالھ مہاڑ کیتی۔ ایوان صدر دے پریس ونگ توں منگل کوں جاری بیان موجب صدر مملکت آکھیا جو اقلیتاں دی عبادت گاہواں کوں غیر قانونی قبضیاں توں چھڑاوݨ کیتے موثر اقدامات دی لوڑھ اے۔ صدر آصف علی زرداری وزارتِ مذہبی امور دی اقلیتی برادری دے حقوق کیتے کوششاں دی تعریف کیتی۔ وفاقی وزیر مذہبی امور سردار محمد یوسف ݙسایا جو اقلیتی فلاحی فنڈ توں 2 ہزار 236 طلباء کوں 6 کروڑ روپے دے تعلیمی وظیفے ݙتے ڳئن جݙاں جو ہک ہزار 231 ضرورتمند لوکاں کوں مالی امداد ݙتی ڳئی۔ وفاقی وزیر آکھیا جو 32 اقلیتی عبادت گاہواں دی مرمت اتے تزئین کیتے 4 کروڑ 50 لکھ روپے دے فنڈز خاص کیتے ڳئے ہن۔ وفاقی وزیر مذہبی امور تے بین المذاہب ہم آہنگی سردار محمد یوسف آکھیا جو بیساکھی، گورو نانک ݙیو جی دی سالگرہ، کٹاس راج اتے سادھو بیلا جیڑھی تقریبات کیتے سہولتاں بلا معاوضہ فراہم کیتی ویندی پئن۔ وفاقی وزیر آکھیا جو نفرت انگیز تقریراں کوں روکݨ کیتے مختلف مذہب دے علما نال مشورے کیتے ویندن۔ وفاقی وزیر اقلیتی برادری دے مسئلیاں دے حل اتے انہاں دے حقوق کوں ودھاوݨ اچ دلچسپی اتے تعاون تے صدر آصف علی زرداری دا شکریہ ادا کیتا۔