وزیراعظم شہباز شریف دا سمبازہ اچ خوارج دے خلاف کامیاب آپریشن تے سکیورٹی فورسز کوں خراج تحسین

اسلام آباد۔12اگست (اے پی پی) وزیراعظم محمد شہباز شریف پاکستان اتے افغانستان دے سرحدی علاقے سمبازہ اچ خوارج دے خلاف ہک بئے کامیاب آپریشن تے سکیورٹی فورسز کوں خراج تحسین پیش کریندیں ہوئیں دہشت گردی دے پورے خاتمے تئیں ایں دے خلاف جنگ جاری رکھݨ دے عزم دا اظہار کیتے۔ منگل کوں وزیراعظم آفس دے میڈیا ونگ ولوں جاری بیان موجب وزیراعظم کڄھ ݙینھ پہلے ایں علاقے اچ 47 خارجیاں کوں جہنم واصل کرݨ دے بعد کَل رات 3 ٻئے بھارتی سرپرستی اچ سرگرم خارجیاں کوں ہلاک کرݨ تے سکیورٹی فورسز دے افسراں تے اہلکاراں دی پیشہ ورانہ صلاحیتاں دی تعریف کیتی۔ وزیراعظم آکھیا جو دہشت گردی دے عفریت دے ملک توں پورے خاتمے تئیں ایں دے خلاف جنگ جاری رکھیسوں۔ انہاں آکھیا جو پاک فوج رات ݙیہہ وطن دی زمین کوں دہشت گرداں توں پاک کرݨ اچ مصروف اے جئیں تے میں سودھی پوری قوم انہاں کوں خراج تحسین پیش کریندی اے، ملک توں دہشت گردی دے پورے خاتمے دے غیر متزلزل عزم اچ پوری قوم پاک فوج دے نال کھڑی اے۔