اقوام متحدہ۔13اگست (اے پی پی) اقوام متحدہ آکھیا جو اکتوبر 2023 دی جنگ دے شروع توں ہݨ تئیں غزہ اچ غذائی قلت دی وجہ توں 100 توں ودھ نینگر شہید تھی ڳئن۔ العربیہ دے مطابق اقوام متحدہ دے دفتر برائے انسانی امور (اوسی ایچ اے) آکھیا جو غزہ اچ نینگراں دی اموات دی تعداد دا ہک سو توں ودھ ونڄݨ ہک تباہ کن مرحلہ اے جو دنیا کیتے شرمندگی دا سبب اے اتے ضروری فوری اقدامات دا تقاضا کریندے۔ اقوام متحدہ دے زیر انتظام عالمی خوراک پروگرام ݙسایا اے جو3 لکھ توں ودھ نینگر شدید خطرے اچ ہن، اتے غزہ دی آبادی دے ہک تہائی توں ودھ لوکاں کئی ݙینہاں توں کڄھ نئیں کھادا۔ ایں دوران واضح کیتا ڳیا جو غزہ اچ بنیادی غذائی ضرورتاں کیتے ماہانہ 62 ہزار ٹن توں ودھ خوراک دی لوڑھ اے، لیکن ہݨ تئیں اتنی مقدار اچ خوراک فراہم کرݨ دی اجازت نئیں ݙتی ڳئی جو تقریباً 20 لکھ لوکاں دی زندگی بچاوݨ کیتے کافی ہووے۔
