ڈی جی آئی ایس پی آر لیفٹیننٹ جنرل احمد شریف چوہدری دی آئی ایس پی آر انٹرن شپ پروگرام اچ شامل طالب علماں نال خصوصی نشست

اسلام آباد۔16اگست (اے پی پی) ڈی جی آئی ایس پی آر لیفٹیننٹ جنرل احمد شریف چوہدری پاک فوج دے شعبہ تعلقات عامہ (آئی ایس پی آر) دے زیر اہتمام جاری انٹرن شپ پروگرام اچ شامل طالب علماں نال خصوصی نشست کیتی، ایں دوران پاکستان خاص طور تے بلوچستان دے حوالے نال وݙی ڳالھ مہاڑ کیتی ڳئی، ڈی جی آئی ایس پی آر بلوچستان نال تعلق رکھݨ آلے طالب علماں دے سوالاں دے تفصیلی جواب وی ݙتے۔ بلوچستان اچ دہشت گردی دے خلاف وݙے آپریشن دے مطالبے تے ڈی جی آئی ایس پی آر آکھیا جو ساݙے ذہن اچ اے ڳالھ پاتی ویندی اے جو بلوچستان دے عوام اتے نینگراں اچ پاکستان کیتے کجھ تیار تھیندا پئے، بلوچستان دے عوام پاکستان اتے صوبے وچال تعلق کوں ٻہوں چنڳے طرح سمجھدن۔ انہاں آکھیا جو میجر محمد انور کاکڑ شہید ساݙا ٻہوں شاندار افسر اتے ایں دھرتی دا پُتر ہئی، میجر محمد انور کاکڑ پہلے وی پی سی ہوٹل گوادر حملے اچ کئی دہشت گرداں کوں جہنم واصل کیتا۔ ڈی جی آئی ایس پی آر آکھیا جو پاکستان کوں آزاد رکھݨ کیتے ہر ݙینھ فوجی افسر، جوان اتے شہری قربانی ݙیندے پئن۔ انہاں آکھیا جو کہیں وی علاقے اچ آپریشن ایں ویلھے کامیاب تھیندے جݙاں عوام خود دہشت گرداں دی نشاندہی کرن، ایجھی کوئی ڳالھ کائنی جو فوج کہیں علاقے کوں خالی کراوے، آپریشن کرے، جݙاں فوج واپس ویسی دہشت گرد ول آویسن۔ ڈی جی آئی ایس پی آر آکھیے جو اساں کوں ٻہوں سمجھداری نال سارا کجھ کرݨا ہوسی ایں کیتے ایں کوں انٹیلی جنس بیسڈ آپریشن دا ناں ݙتا ویندے۔ انہاں آکھیا جو فوج دی ایں اچ کوئی دلچسپی کائنی جو او دہشت گردی دے ناں تے نشوم عوام دی جان گھنے، جے کوئی شہری دہشت گرداں کوں پناہ ݙیندے یا گھر اچ بارودی مواد رکھیندے تاں ایں کوں نتیجے بھوڳݨے پمسن۔ انہاں آکھیا جو اساں کوں بلوچستان دے عوام اتے انتظامیہ دے نال رَل تے کم کرݨا اے، دہشت گرداں انہاں دے سہولت کاراں اتے منصوبہ سازاں کوں وی سامݨے گھن آوݨا اے، ہک بندے دی دہشت گردی دی سزا پورے علاقے یا پوری وستی نئیں ݙتی ونڄ سڳدی۔ انہاں آکھیا جو دہشت گردی دے خلاف اوتھاں دی عوام خود کھڑی تھیوݨی اے اتے کھڑی تھیندی پئی اے، بلوچستان دے عوام ہݨ ݙسیندے پئن جو اتھاں دہشت گرد ہن اے انہاں دا سہولت کار اے، بلوچستان دے عوام وی ہݨ انہاں دہشت گرداں توں عاجز اتے تنگ آ چکن، تساں بلوچستان ونڄو اتے ݙیکھو جو بلوچ عوام کتنے سمجھدار اتے دور اندیش لوک ہن۔ انہاں آکھیا جو سینکڑاں مثالاں سامݨے آئیاں ہن جو بلوچ ٻال پڑھ ڳئن او آپݨے علاقے اتے آپݨی تقدیر دے مالک بݨ چکن، کیمبرج یونیورسٹی توں بلوچستان دے مایا ناز سائنسدان صمد یار جنگ بلیدہ سکول دا فارغ التحصیل اے، شاہ زیب رند وی بلوچستان نال تعلق رکھیندے اتے اڄ آپݨی تقدیر دا مالک اے، بلوچستان دیاں ٻالڑیاں ایں ویلھے ضلعیں اچ ڈپٹی کمشنر تعینات ہن۔ ڈی جی آئی ایس پی آر آکھیا جو پاکستان سارے لسانی، علاقائی چیزاں توں ہٹ تے کلمے دی بنیاد تے قائم تھئے، نبی پاکؐ فرمایا ہئی کہیں عجمی کوں عربی، کہیں عربی کوں عجمی، کہیں گورے کوں کالے اتے کہیں کالے کوں گورے تے فضیلت کائنی۔ انہاں آکھیا جو بلوچستان دی آبادی 15 ملین اے، ایں اچ 50 فیصد لوک بلوچستان نی بلکہ پاکستان دے ݙوجھے حصیں اچ رہندن، بلوچستان اچ سارے بلوچ کائںی ایں اچ 30 فیصد توں ودھ پختون ہن۔ ڈی جی آئی ایس پی آر آکھیے جو جتنے بلوچ بلوچستان اچ رہندے ہن ایں توں ودھ سندھ دے قبیلیں اتے جنوبی پنجاب اچ رہندن۔انہاں آکھیا جو پاکستان دا مطلب لا الہ الا اللہ اے تہاݙے اندر رچ وس چکئے کیوں جو پاکستان کلمے دی بنیاد تے بݨیا۔