وزیراعظم دی این ڈی ایم اے کوں طوفانی بارشاں تے سیلاب توں نقصاناں دا حتمی جائزہ ڳھنݨ، خیبر پختونخوا دے متاثرین اچ امدادی شئیں دی ونݙ دی حکمت عملی ݙیوݨ دی ہدایت

اسلام آباد۔18اگست(اے پی پی)وزیراعظم محمد شہباز شریف این ڈی ایم اے کوں طوفانی بارشاں تے سیلاب توں تھیوݨ آلے نقصاناں دا تیکھے حتمی جائزہ ڳھنݨ اتے خیبر پختونخوا دے متاثرین کوں امدادی شئیں دی ونݙ دا جامع لائحہ عمل پیش کرݨ دی ہدایت کریندے آکھیے جو ایں اوکھے ویلھے وفاقی، صوبائی حکومت دا کوئی وانڄھ کائنی، اساں متاثرین دی مدد و بحالی کرݨی اے، مصیبت زدہ پاکستانی ٻھیݨ ٻھراواں دی مدد ساڈی قومی ذمے واری اے۔ انہاں اے ڳالھ اسلام آباد اچ خیبر پختونخوا، گلگت بلتستان تے آزاد کشمیر اچ طوفانی بارشاں و سیلاب دے متاثرین کیتے جاری امدادی سرگرمیاں دے حوالے نال اعلیٰ سطح اجلاس نال خطاب کریندے آکھی۔ وزیراعظم خیبر پختونخوا دے سیلاب متاثرین کیتے وفاقی کابینہ دی ہک مہینے دی تنخواہ عطیہ کرݨ دا اعلان کیتے ۔ انہاں خیبرپختونخوا دے مختلف ضلعیاں اچ بارشاں و سیلاب توں متاثرین دی مدد اچ وفاقی اداریاں کوں ٻیا متحرک تھیوݨ دی ہدایت کریندے آکھیے جو اساں متاثرہ لوکاں دی مدد و بحالی یقینی بݨاوݨی اے، مصیبت زدہ پاکستانی ٻھین بھراواں دی مدد اساڈی قومی ذمے واری اے، اے سیاست دا نئیں خدمت دا اتے لوکاں دے ݙکھاں دا مداوا کرݨ دا ویلھا اے۔ وزیراعظم آکھیے جو وفاقی حکومت جاں بحق تھیوݨ آلے لوکاں دے نال نال متاثرین کوں وزیراعظم پیکج دے تحت وی امدادی رقماں ݙیسی۔ وزیراعظم ہدایت کیتی جو متاثرہ علاقیاں اچ امدادی شئیں دی ونݙ و بحالی دے آپریشن دی نگرانی وزیر امور کشمیر و گلگت بلتستان کریسن، متاثرہ علاقیاں اچ بجلی، پاݨی، سڑکاں و ٻیاں سہولتاں دی بحالی دی نگرانی متعلقہ وفاقی وزرا خود کریسن۔ وزیراعظم ہدایت کیتی جو سارے متعلقہ وزرا خیبر پختونخوا، آزاد کشمیر اتے گلگت بلتستان آپ ونڄن، این ایچ اے شاہراہواں دی بحالی اچ صوبائی یا قومی شاہراہواں اچ تخصیص نہ کرے، امداد کیتے رستے کھولݨ پہلی ترجیح رکھی ونجے۔ وزیراعظم وزارت مواصلات، این ایچ اے اتے ایف ڈبلیو او کوں متاثرہ علاقیاں اچ شاہراہواں اتے پلاں دی مرمت یقینی بݨاوݨ اتے وزیر مواصلات کوں انہاں علاقیاں اچ آپ ونڄ تے بحالی آپریشن دی نگرانی دی ہدایت کیتی ۔ وزیراعظم وزیر بجلی کوں متاثرہ علاقیاں اچ آپ ونڄ تے معائنہ کرݨ اتے بجلی دا نظام ترجیحی بنیاداں تے بحال کراوݨ دی ہدایت وی کیتی۔ انہاں حکم ݙتے جو این ڈی ایم اے تیکھے نقصاناں دا حتمی جائزہ پیش کرے، این ڈی ایم اے امدادی شئیں دی خیبر پختونخوا دے متاثرین اچ امدادی شئیں دی ونݙ دا جامع لائحہ عمل وی پیش کرے۔ وزیراعظم وزارت خزانہ کوں این ڈی ایم اے کوں ضروری وسائل ݙیوݨ دی ہدایت کریندے آکھیے جݙاں تئیں متاثرہ علاقیاں اچ آخری بندے تئیں مدد اتے بنیادی انفراسٹرکچر دی بحالی نئیں تھیندی، متعلقہ وفاقی وزرا اتھاں رہسن۔ انہاں وزارت صحت کوں ڈاکٹرز دی ٹیماں اتے دوائیاں خیبر پختونخوا بھیجݨ اتے طبی کیمپ قائم کرݨ دی ہدایت وی کیتی اتے بے نظیر انکم سپورٹ پروگرام کوں وی متاثرین دی مدد کیتے متحرک کرݨ دا حکم ݙتا۔ وزیراعظم اتے اجلاس دے شرکاء سیلاب اچ جاں بحق تھیوݨ آلے لوکاں دے درجات دی بلندی اتے زخمیاں دی صحت یابی کیتے دعا کیتی ۔ وزیراعظم محمد شہباز شریف دی زیر صدارت خیبر پختونخوا، گلگت بلتستان اتے آزاد کشمیر اچ حالیہ تباہ کن بارشاں و سیلاب دے متاثرین دی مدد و بحالی تے جائزہ اجلاس کوں این ڈی ایم اے اتے وزیراعظم ولوں مدد کیتے مقرر کردہ وفاقی وزراء دی جاری امدادی سرگرمیاں تے بریفنگ ݙتی ڳئی۔اجلاس کوں ݙسایا ڳئے جو وفاقی حکومت، صوبائی حکومتاں، پاک فوج و ٻئے اداریاں ولوں ہݨ تئیں متاثرین کیتے 456 ریلیف کیمپ ٻݨاوݨ دے نال نال 400 ریسکیو آپریشن کیتے ڳن، متاثرین کیتے امدادی شئیں دےٹرک پڄائے ویندے پئن۔ وزیراعظم ہدایت کیتی جو ساریں توں ودھ متاثرہ علاقیاں اچ امدادی ٹرکاں دے قافلیاں کوں ترجیحاتی بنیاداں تے پہلے بھیجیا ونجے، ہݨ تئیں دے محتاط اندازے دے مطابق 126 ملین روپے توں ودھ دے سرکاری و نجی املاک دے نقصاناں دا تخمینہ لایا ڳئے ۔ این ڈی ایم اے راشن، خیمیاں، دوائیاں، میڈیکل ٹیماں و بیاں شئیں ٻھیڄݨ دی رپورٹ پیش کیتی۔ اجلاس کوں ݙسیا ڳئے جو ستمبر دے ݙوجھے ہفتے تئیں مون سون جاری رہسی، 6 وݙے سپیل گزر چکین جݙاں جو ٻئے 2 متوقع ہن جیںدے اثرات ستمبر دے آخری ہفتے تئیں رہسن۔ اجلاس اچ وفاقی وزیر امور آزاد کشمیر و گلگت بلتستان انجینئر امیر مقام سوات، وزیر بجلی سردار اویس خان لغاری خیبرپختونخوا، معاون خصوصی مبارک زیب باجوڑ، چیئرمین این ایچ اے مالاکنڈ جݙاں جو سیکرٹری مواصلات گلگت توں صورتحال تے جائزہ پیش کیتا۔ وزیر مذہبی امور سردار محمد یوسف، وزیر آبی وسائل میاں محمد معین وٹو، ڈاکٹر مصدق ملک اتے ٻئے حکام وزیراعظم دی ہدایت دے مطابق امدادی سرگرمیاں دا ݙسایا۔ اجلاس اچ وفاقی وزرا خواجہ آصف، احسن اقبال، مصدق مسعود ملک، احد خان چیمہ، عطاء اللہ تارڑ، انجینئر امیر مقام، سردار اویس خان لغاری، سردار محمد یوسف، میاں محمد معین وٹو، معاون خصوصی مبارک زیب، چیئرمین این ڈی ایم اے لیفٹیننٹ جنرل انعام حیدر ملک، وزیراعظم دے چیف کوآرڈینیٹر مشرف زیدی اتے متعلقہ اعلیٰ حکام شرکت کیتی۔