اسلام آباد۔28اگست (اے پی پی) سپیکر قومی اسمبلی سردار ایاز صادق بھارت دی طرفوں سندھ طاس معاہدے دی ہک پاسے معطلی اتے بغیر پہلے توں اطلاع دے سپل ویز کھولݨ اتے پاݨی چھوڑݨ دے عمل کوں کھلی آبی جارحیت اتے بین الاقوامی قوانین دی سنگین خلاف ورزی قرار ݙتے۔ انہاں بھارت دی طرفوں ایں اقدام کوں نشوم شہری آبادی کوں دٻاوݨ دی دانستہ سازش وی قرار ݙتا۔ آپݨے ہک بیان اچ سپیکر سردار ایاز صادق آکھیے جو بھارت سندھ طاس معاہدے دے تحت طے شدہ ضابطیں کوں نظرانداز کریندیں پاکستان کوں پہلے توں اطلاع ݙتے بغیر پاݨی چھوڑئے، ایں عمل نال پاکستان دے ٻہوں سارے علاقیں اچ زور دی چھل آئی اے جیں دے نتیجے اچ کئی قیمتی انسانی جاناں ڳئن اتے بنیادی ڈھانچے کوں وݙے پیمانے تے ضیان پُڄیا۔ سپیکر قومی اسمبلی آکھیا جو بھارت ویلھے تے اطلاع ݙتی ہوندی تاں پاکستان حفاظتی اقدامات چا تے وݙے جانی و مالی ضیان توں بچ سڳدا ہئی۔ انہاں مزید آکھیا جو اے بھارتی رویہ نہ صرف غیر ذمہ دارانہ اے بلکہ خطے دے امن و استحکام کیتے وی خطرہ اے، مودی حکومت اندرلیاں ناکامیاں توں توجہ ہٹاوݨ کیتے پاکستان دے خلاف مسلسل سازشاں اچ مصروف اے تاں جو دنیا ہݨ بھارت دی اصل شکل کوں سنڄاݨ چُکی اے اتے ایں دیاں جارحانہ پالیسیاں توں آگاہ تھی چُکی اے۔ سپیکر سردار ایاز صادق 10 مئی 2025 کوں بھارتی جارحیت دے خلاف پاکستانی قوم دے ہکو جیہے ردعمل کوں خراجِ تحسین پیش کریندیں آکھیا جو پاکستانی عوام اتے مسلح افواج دشمن کوں منہ بھن جواب ݙتا اتے ثابت کیتا جو اساں ہک وݙی اتے خودمختار قوم ہیسے، بھارتی آبی جارحیت دے خلاف وی پوری قوم یکجہتی دا مظاہرہ کریندی پئی اے اتے ہر محاذ تے آپݨے وطن دا دفاع کرݨ کیتے تیار اے۔ سپیکر قومی اسمبلی اڄوکی چھل متاثرہ لوکاں دے نال مکمل یکجہتی کریندیں آکھیے جو پاک فوج، قومی ادارے اتے عوام ریسکیو و بحالی دے کماں اچ ݙینھ رات مصروف ہن، متاثرہ علاقیں اچ پاک فوج دے جوان امدادی سرگرمیاں اچ ساریں توں اڳوں موجود ہن۔انہاں آکھیا جو اساں ایں اوکھے ویلھے چھل متاثرین کوں کلھا نہ چھوڑیسسوں۔انہاں اللہ تعالیٰ توں چھل ریلے دے نتیجے اچ شہید تھیوݨ آلے دے درجات دی بلندی اتے گھر آلیں سانڳے ناقابل تلافی ضیان برداشت کرݨ کیتے صبر جمیل دی دعا کیتی۔ سپیکر قومی اسمبلی اللہ تعالیٰ توں زخمیاں دی وقتی صحت کیتے وی دعا کیتی۔
