اسلام آباد۔28اگست (اے پی پی) سرکاری ملکیت دے اداریں بارے کابینہ دی کمیٹی نیشنل انجینئرنگ سروسز پاکستان (نیسپاک) دے بورڈ آف ڈائریکٹرز دی ول تشکیل کیتے نامزدگی متعلق پینل دی منظوری ݙے ݙتی اے۔ کمیٹی دا اجلاس وفاقی وزیر خزانہ و محصولات سینیٹر محمد اورنگزیب دی اڳواݨی اچ تھیا۔ اجلاس اچ نیشنل انجینئرنگ سروسز پاکستان (نیسپاک) دے بورڈ آف ڈائریکٹرز دی ول تشکیل متعلق معاملے دا جائزہ ڳھدا ڳیا۔ ایس او ایز (گورننس اینڈ آپریشنز) ایکٹ 2023 دے تقاضیں موجب بورڈ دی نامزدگی متعلق کمیٹی دی سفارش تے کابینہ دی کمیٹی پینل دی منظوری ݙے ݙتی۔ پینل اچ جاوید اسلم محمد علی، پیر سعد احسن الدین، عمر حسن اتے شہانہ احمد علی شامل ہن۔ انہاں ساریاں شخصیات کوں انہاں دی پیشہ ورانہ قابلیت اتے متعلقہ مہارت دی بنیاد تے چُݨیا ڳئے۔ اجلاس اچ ݙسایا ڳیا جو سرکاری اداریں دے بورڈ آف ڈائریکٹرز دی تشکیل دی اہمیت اتے ہنگامی نوعیت پاروں اے ضروری اے جو نامزدگیاں دے انتخاب اتے جانچ پڑتال دا عمل متعلقہ محکمیں اتے اداریں دی طرفوں ویلھے تے اتے مربوط انداز اچ مکمل کیتا ونڄے تاں جو ایں عمل اچ غیر ضروری دیر توں بچیا ونڄ سڳے۔ اجلاس اچ وفاقی وزیر ہاؤسنگ اینڈ ورکس میاں ریاض حسین پیرزادہ، وزیر تجارت جام کمال خان، وفاقی وزیر سائنس و ٹیکنالوجی خالد حسین مگسی، وفاقی وزیر بحری امور محمد جنید انور چوہدری، وفاقی سیکرٹریز اتے متعلقہ وزارتاں، محکمیں اتے ریگولیٹری اداریں دے سینئر حکام شرکت کیتی۔
