وزیر آباد۔28اگست(اے پی پی)وفاقی وزیر اطلاعات و نشریات عطاء اللہ تارڑ آکھیے جو دریائے چناب اچ طغیانی پاروں وزیر آباد کوں خطرہ ہئی، بہترین کوآرڈینیشن پاروں وݙے نقصان توں بچ ڳئے ہیں، کوئی جانی نقصان نئیں تھیا، سارے اداریں رل تے کم کیتے، مزید بارشاں کیتے ودھ تیاری اے۔ وزیر آباد اچ میڈیا کوں سیلاب دی صورتحال دے تے بریفنگ ݙیندے وفاقی وزیر اطلاعات آکھیا جو گوجرانوالہ اچ دریائے چناب اچ طغیانی پاروں وزیر آباد کوں خطرہ ہئی، پاݨی دا بہاؤ ݙاہ توں ساݙھے ݙاہ لکھ کیوسک رہے جݙاں جو ماضی اچ چھی لکھ کیوسک توں ودھ پاݨی کوں اوچے درجے دا سیلاب سمجھیا ویندا ہئی۔ انہاں آکھیا جو بہترین کوآرڈینیشن پاروں کوئی جانی نقصان نئیں تھیا، نیشنل ڈیزاسٹر مینجمنٹ اتھارٹی (این ڈی ایم اے) ویلھے تے الرٹ جاری کیتے، پی ڈی ایم اے، ریسکیو 1122 اتے ضلعی انتظامیہ موثر اتے تکھا رسپانس ݙتا جݙاں جو پاک فوج وی اڳو اڳو رہی اے، متاثرہ علاقیں اچ فوری انخلاء، ریلیف اتے بحالی دے اقدامات کیتے ڳئن، اے قومی رسپانس اے، اینڄھی مثالی کوآرڈینیشن گھٹ ہی ݙیکھݨ کوں ملسی، جیویں ہی سیلابی ریلا آیا، انتظامیہ وی تیار ہئی اتے متاثرہ علاقیں توں لوکاں دے انخلاء کوں ممکن بݨایا ڳیا۔ انہاں آکھیا جو رابطہ سڑکاں دی بحالی دے حوالے نال سروے تیکھے تئیں پورا تھی ویسی، وزیراعظم این ایچ اے کوں صوبائی سڑکاں دی بحالی کیتے تعاون دی ہدایت کیتی اے۔ انہاں آکھیا جو وفاقی وزیر توانائی اویس لغاری وی گوجرانوالہ آندے پئن، بجلی دے کجھ فیڈرز کوں عوام دے تحفظ پاروں بند کیتا ڳیا ہئی تاں جو کرنٹ دا خطرہ نہ تھیوے، او وی بحال کیتے ویسن۔ انہاں آکھیا جو کھاوݨ پیوݨ دی شئیں، خیمے اتے دوائیں دے حوالے نال سارے انتظامات موجود ہن، پاک فوج امدادی کاروائیاں اچ شامل اے جݙاں جو مال مویشیاں دے ضیان دا اندازہ لایا ویندا پئے، نقصانات دا ازالہ وی کیتا ویسی۔ انہاں آکھیا جو لوکاں دیاں مشکلات دا احساس اے، جنہاں لوکاں کوں نقل مکانی کرݨی پئی اساݙیاں ہمدردیاں انہاں دے نال ہن، پوری انتظامیہ ایں کوشش اچ اے جو انہاں دے گھراں کوں بحال کیتا ونجے۔ وفاقی وزیر آکھیا جو آندے کڄھ ہفتیاں اچ مزید بارشاں دی پیشنگوئی اے، ڄے تئیں اے سلسلہ ختم نئیں تھی ویندا طغیانی دا خطرہ موجود راہسی، شہری احتیاط کرن، شہریاں کوں ملیریا اتے پاݨی توں کھنݙݨ بیماریاں دے حوالے نال پوری آگاہی ݙتی ویندی پئی اے اتے انتظامیہ وی ایں حوالے نال متحرک اے۔ انہاں آکھیا جو ایں ویلھے پاݨی دا بہاؤ خانکی اچ ساݙھے پنج لکھ کیوسک اتے قادر آباد اچ چھی لکھ 60 ہزار کیوسک اے۔ وزیر آباد دے علاقے خانکی اتے قادر آباد دے نال دیہات الحمد اللہ محفوظ ہن، اساں وݙے نقصان توں بچ ڳئے ہیں، ویلھے تے اتے پیشگی اطلاع دی وجہ توں اے ممکن تھی سڳے، پنجاب حکومت کہیں وی ہنگامی صورتحال نال نبڑݨ کیتے پوری طرح تیار ہئی، سارے ادارے ٹیم ورک دے طور تے کم کریندے پئن جݙاں جو میڈیا دا وی ایں وچ اہم کردار اے۔ وفاقی وزیر آکھیا جو ضلعی انتظامیہ متاثرین کوں ہر ممکن مدد ݙیندی پئی اے، اڳو تے وی کوشش ہوسی جو ایہو ڄھیں ٹیم ورک نال ریلیف اتے ریسکیو سرگرمیاں جاری رہون، جنہاں علاقیں اچ خطرہ ٹل ڳئے اتھاں متاثرہ عوام کوں ولا آباد کیتا ویسی۔ انہاں آکھیا جو ضلعی انتظامیہ ولوں بہترین انتظامات دی تعریف کیتی ونجݨی چاہیدی اے۔ سارے اداریں بھرپور کردار ادا کیتے جیندے نال وݙے نقصان توں بچاؤ ممکن تھیا اتے اے تعاون اڳو تے وی جاری راہسی۔ انہاں آکھیا جݙاں وی کوئی آفت آندی اے تاں پوری پاکستانی قوم متحد تھی ویندی اے، خیبر پختونخوا آلی کار اتھاں وی اساں رل مل تے صورتحال کوں چنڳا بݨیسوں، عوام وی اوکھے ویلھے اچ انتظامیہ دے نال ہتھ ونݙائے، آندے کڄھ ݙینھاں اچ صورتحال بہتر تھی ویسی۔ ہک سوال دے ولدے اچ انہاں آکھیا جو خطے اچ بارشاں معمول توں ودھ تھئین، پہلی واری تھئے جو ترائے چار ویدر سسٹم کٹھے آئن، مزید بارشاں دی پیشنگوئی اے جیںدے کیتے اساݙی بھرپور تیاری اے۔ وفاقی وزیر آکھیا جو آبی گذر گاہواں دے نیڑے عمارتاں کوں روکݨا ہوسی۔ انہاں آکھیا جو فوت تھیوݨ آلے لوکاں دے لواحقین کوں ہک بندے کیتے 20 لکھ روپے معاوضہ رکھیا ڳئے۔ انہاں آکھیا جو گم تھیوݨ آلے لوکاں دی تلاش جاری اے۔ وفاقی وزیر آکھیا جو ہݨ ویلھا اے جو واٹر سٹوریجز، ڈیمز اتے ڈرینجز بݨائے ویسن، ایں تے کم جاری اے اتے جیویں ہی ہنگامی صورتحال ختم تھیسی، قومی سطح تے اہم فیصلے کیتے ویسن۔
