اسلام آباد۔28اگست(اے پی پی)وزیراعظم دے معاونِ خصوصی برائے صنعت و پیداوار ہارون اختر خان دی اڳواݨی اچ ڈرگ ریگولیٹری اتھارٹی آف پاکستان (ڈریپ) دے اعلیٰ سطح اجلاس اچ روس نال انسولین دی پیداوار دے سانجھے منصوبے دا جائزہ گھدا ڳیا۔ اجلاس اچ روسی حکومت دے نمائندے ڈینس نزاروف، سیکرٹری صنعت و پیداوار سیف انجم اتے ڈرگ ریگولیٹری اتھارٹی دے اعلیٰ حکام وی شامل ہن۔ وزارت صنعت و پیداوار دے مطابق اجلاس دے دوران پاکستان اچ مقامی سطح تے انسولین دی تیاری اتے روس نال سانجھے منصوبے تے تفصیلی گالھ مہاڑ کیتی ڳئی۔ ایں موقع تے معاون خصوصی ہارون اختر خان آکھیا جو روس نال انسولین مینوفیکچرنگ دا منصوبہ ݙو پاسے تعلقات دے ہک نویں دور دی بنیاد رکھیسی۔ انہاں زور ݙتا جو وزیراعظم شہباز شریف دی قیادت اچ غیر ملکی سرمایہ کاری اتے ٹیکنالوجی دی منتقلی کوں یقینی بݨایا ونجے۔ ہارون اختر خان آکھیا جو پاکستان اچ انسولین دی تیاری مرحلہ وار ہوسی جݙاں جو ترائے سال اچ بلک پروڈکشن اتے ٹیکنالوجی ٹرانسفر کوں عملی شکل ݙتی ویسی۔ انہاں آکھیا جو اے سانجھا منصوبہ کاروباری تعاون دے نویں مواقع ݙیسی اتے عوام کوں ضروری دوائیں کوں یقینی بݨیسی۔ انہاں ایں ڳالھ تے وی زور ݙتا جو منصوبے دی کامیابی کیتے شراکت دار کمپنیاں دی سخت پابندی اتے عملدرآمد ضروری ہوسی۔
