اسلام آباد۔28اگست(اے پی پی)چیئرمین سینیٹ سید یوسف رضا گیلانی صوبہ پنجاب دے دریاواں اچ شدید طغیانی اتے ودھدی سیلابی صورتحال تے چنتا کریندے مخیر حضرات، فلاحی تنظیماں اتے سارے متعلقہ اداریں توں اپیل کیتی جو او ایں اوکھے ویلھے اچ سیلاب متاثرین دا پورا ہتھ ونݙاون تاں جو متاثرہ خانداناں کوں فوری ریلیف ݙتا ونج سڳے۔ چیئرمین سینیٹ آکھیا جو دریائے چناب، راوی اتے ستلج اچ پاݨی دی سطح اچ خطرناک حد تئیں ودھارا تھیندا پئے اتے انہاں دے سیلابی ریلے ہݨ جنوبی پنجاب دو ودھدے پئن۔ ایں صورتحال پاروں اتھو دے عوام کوں احتیاط ورتݨ دی لوڑھ ات، لوک حکومت دیاں ہدایتاں تے عمل کریندے ہوئیں تیکھے توں تیکھے محفوظ ڄاہیں تے لڳے ونڄن، ایں ویلھے قومی یکجہتی، عوامی تعاون اتے باہمی ہم آہنگی ݙکھاوݨی ہوسی، عوام توں اپیل اے جو او حکومتی اداریں دے نال ودھ تعاون کرن اتے اپݨیاں جاناں بچاوݨ کیتے بغیر دیر کیتے محفوظ مقامات تے منتقل تھی ونجن جݙاں جو مخیر حضرات اتے فلاحی تنظیماں وی اڳوں ودھ تے اپݨے وسائل کوں استعمال کرن تاں جو غریب اتے بے سہارا عوام کوں اوکھے حالات اچ سہارا مل سڳے۔ چیئرمین سینیٹ زور ݙتا جو متاثرہ علاقیں اچ ریلیف اتے ریسکیو آپریشنز کوں تکھا بݨایا ونجے تاں جو جانی و مالی نقصان کوں گھٹ توں گھٹ رکھیا ونج سڳے۔ انہاں آکھیا جو سیلابی ریلیاں پاروں ہزاراں خاندان متاثر تھی سڳدن، ایں سانڳے پیشگی اقدامات اتے عوامی تعاون ضروری اے۔ سید یوسف رضا گیلانی آکھیا جو آزمائش دے ایں ویلھے اچ پوری قوم کوں اتحاد اتے یکجہتی نال اڳوں ودھݨا ہوسی تاں جو متاثرہ عوام کوں مشکلات توں کݙھیا ونج سڳے
