اسلام آباد۔28اگست(اے پی پی)وفاقی وزیر برائے قومی صحت سید مصطفی کمال آکھیا جو سیلاب متاثرین کوں طبی سہولتاں ݙیوݨ کیتے سارے وسائل لائے ویندے پین ، قومی ادارہ صحت وبائی بیماریاں دی نگرانی اتے اعداد وشمار وی کٹھے کریندا پئے۔ فلڈ ایمر جنسی آپریشن سیل قومی ادارہ صحت اچ تھیوݨ آلے اجلاس دی اڳواݨی کریندے انہاں انہاں پورے ملک اچ سیلاب متاثرین کوں طبی سہولتاں بارے جاری اقدامات دا جائزہ گھدا۔ انہاں آکھیا جو وزارت صحت اتے ماتحت ادارے کہیں وی صورتحال نال نبڑݨ کیتے الرٹ ہن، وزارت صحت صورتحال دی مانیٹرنگ کریندی پئی اے، سارے صوبیں دے ڈی جیز ہیلتھ دے آفس اچ چوی ڳھنٹے کنٹرول روم ٻݨائے ڳن، صوبائی حکومت ولوں سیلاب دی کوآرڈینیشن بارے فوکل پرسن مقرر کر ݙتن، وزارت صحت اتے ایںدے متعلقہ ادارے این ڈی ایم اے صوبائی حکومت نال پورا رابطے اچ ہین۔ انہاں آکھیا جو وزارت صحت صوبیں دی لوڑھ دے مطابق ضروری دوائیاں اتے ویکسین خیبر پختونخوا اتے گلگت بلتستان بھیجن اتے وزارت صحت ضروری دوائیاں دے سٹاک دی ودھ مقدار اچ سپلائی دی پوری تیاری کریندی پئی اے، سیلاب متاثرین کوں طبی سہولتاں کیتے وزارت صحت صوبیں دے نال کھڑی اے۔ اجلاس اچ وفاقی سیکرٹری صحت حامد یعقوب، چیف ایگزیکٹو آفیسر قومی ادارہ صحت، سربراہ عالمی ادارہ صحت سودھا ڈی جی ہیلتھ اسلام آباد اتے صوبیاں دے صحت حکام اتے نمائندے وی شامل ہن۔
