اسلام آباد: 28 اگست(اے پی پی)وفاقی وزیر برائے قومی ورثہ و ثقافت ڈویژن اورنگزیب خان کھچی آکھیے جو پاکستان اتے چین دی لازوال دوستی خطے اچ امن، ترقی اتے خوشحالی دی سڄاکی ضمانت اے۔ اے ڳالھ انہاں ادارہ فروغ قومی زبان اسلام آباد اتے انسٹی ٹیوٹ فار کمیونٹی ود شیئرڈ فیوچر، کمیونیکیشن یونیورسٹی آف چائنا بیجنگ دے ڳانݙھے نال “پاکستان-چین مثالی دوستانہ تعلقات: خطاطی دے شیشے اچ” دے عنوان نال ادارہ فروغ قومی زبان اسلام آباد اچ تقریب نال الیندے آکھی۔ تقریب چین اتے پاکستان دے قومی ترانیاں نال شروع تھئی۔ تقریب دی صدارت وفاقی وزیر برائے قومی ورثہ و ثقافت ڈویژن اورنگزیب خان کھچی کیتی۔ وفاقی وزیر اورنگزیب خان کھچی خطاطی نمائش دا افتتاح کیتا اتے آکھیا جو پاکستان اتے چین دی لازوال دوستی خطے اچ امن، ترقی اتے خوشحالی دی ضمانت اے، اینڄھیاں تقریباں اتے نمائشاں عوامی و ثقافتی سطح تے تعلقات ٻئے ودھیندن۔ ایں موقع تے ڈین انسٹی ٹیوٹ فار کمیونٹی ود شیئرڈ فیوچر، کمیونیکیشن یونیورسٹی آف چائنا بیجنگ پروفیسر ڈاکٹر لی ہائولیی اینگ ہک خصوصی ویڈیو پیغام وی ݙیتا۔ پاکستان اچ چین دے سفارت خانہ دے سیاسی و پریس قونصلر وانگ شانگ جی چین دی نمائندگی کیتی۔ ایسوسی ایٹ پروفیسر شعبہ اردو نیشنل یونیورسٹی آف ماڈرن لینگویجز ڈاکٹر عابد سیال، چیئرمین امپلی مینٹیشن ٹریبونل فار نیوز پیپر ایمپلائز اسلام آباد شاہد محمود کھوکھر اتے ٻئے مقررین وی خطاب کیتا۔ تقریب اچ ادارہ فروغ قومی زبان اسلام آباد دے شعبہ خطاطی توں تربیت یافتہ طالب علم دے فن پاریاں کوں وی شامل کیتا ڳیا ہا۔ ایں توں پہلے شجرکاری مہم دے تحت وفاقی وزیر برائے قومی ورثہ و ثقافت ڈویژن اورنگزیب خان کھچی، ڈائریکٹر جنرل اتے ایگزیکٹو ڈائریکٹر، ادارہ فروغ قومی زبان ادارے دے باغیچے اچ ٻوٹے لائن۔
