اسلام آباد۔29اگست (اے پی پی) سپیکر قومی اسمبلی سردار ایاز صادق نال آئرلینڈ دی سفیر میری او نیل پارلیمنٹ ہاؤس اسلام آباد اچ ملاقات کیتی۔ قومی اسمبلی سیکرٹریٹ موجب سپیکر ایں موقع تے ڳالھ مہاڑ کریندیں آکھیا جو پاکستان عالمی موسمیاتی تبدیلیاں اچ گھٹ حصہ دار لیکن ساریں توں زیادہ متاثر تھیوݨ آلا ملک اے۔اڄوکی چھل دیاں دیاں تباہ کاریاں 2022 دی چھل توں ودھ تباہ کن ہن۔ طوفانی مینھ اتے بھارت دی طرفوں چھوڑئے ڳئے پاݨی دی وجہ نال پاکستان اچ زور دی تباہی تھئی اے۔ دریاواں دا سُکݨ اتے تجاوزات چھل دی شدت کوں ودھیندے پئن۔ پارلیمانی رابطے ݙوہیں ملکاں وچال تعاون ودھاوݨ کیتے اہم ہن۔ آئرلینڈ دی سفیر پاکستان اچ چھل پاروں تھیوݨ آلے جانی اتے مالی ضیان تے ݙکھ تے افسوس کیتا ۔ آئرلینڈ اچ رہݨ آلی پاکستانی کمیونٹی دی صحت دے شعبے اچ خدمتاں تعریف دے لائق ہن۔ آئرلینڈ دی سفیر پاکستان اچ چھل متاثرین دی بحالی کیتے ہر ممکن تعاون کرݨ دا یقین ݙیوائے۔
