اسلام آباد۔29اگست (اے پی پی) وفاقی وزیر قانون و انصاف سینیٹر اعظم نذیر تارڑ نال برطانوی ہاؤس آف لارڈز دے رُکن لارڈ پال اسلام آباد اچ ملاقات کیتی۔ ترجمان موجب ملاقات اچ پاکستان اتے برطانیہ وچال قانونی تعلیم کوں بہتر بݨاوݨ اتے قانونی اصلاحات دے شعبے اچ تعاون ودھاوݨ تے ڳالھ مہاڑ کیتی ڳئی۔ ڈائریکٹر لیگل ایجوکیشن پاکستان بیرسٹر اسامہ ملک وی ایں موقع تے موجود ہن اتے انہاں قیمتی مشورے ݙتے۔ ملاقات دے دوران فریقین مضبوط قانونی اداریں، عالمی تعلیمی تبادلیں اتے قانونی تربیت و اصلاحات اچ بین الاقوامی چنڳے عملی نمونیں کوں اپناوݨ دی اہمیت تے زور ݙتا۔ وفاقی وزیر قانون پاکستان اچ معیاری قانونی تعلیم کوں ودھاوݨ دے عزم دا اظہار کریندیں آکھیے جو حکومت پائیدار اتے موثر اصلاحات گھن آوݨ کیتے بین الاقوامی شراکت داراں دے نال رَل تے کم کرݨ کیتے پرعزم اے۔ لارڈ پال پاکستان اچ قانونی فریم ورک کوں تکڑابݨاوݨ کیتے کیتیاں ونڄݨ آلیاں کوششاں دی تعریف کیتی اتے قانونی تعلیم، پالیسی بݨاوݨ اتے ادارہ جاتی ترقی دے شعبیں اچ تعاون کوں مزید ودھاوݨ کیتے برطانیہ دی دلچسپی دا اظہار کیتا۔ ملاقات دا اختتام ایں ڳالھ تے تھیا جو ݙوہیں ملک قانونی اداریں وچال مسلسل ڳالھ مہاڑ، تبادلے دے پروگرام اتے سانجھے اقدامات دے مزید موقع لبھسین۔
