اسلام آباد۔29اگست (اے پی پی) چیئرمین سینیٹ سید یوسف رضا گیلانی ایں عزم دا اعادہ کیتے جو پاکستان سری لنکا دے نال نہ صرف ثقافتی رابطیں کوں ودھیسی بلکہ ٹیکسلا، تخت بھائی اتے وادی سوات اچ موجود سانجھے بدھ مت ورثے دے علاقیں کوں محفوظ بݨاوݨ اتے عوامی سطح تے رابطے ودھاوݨ کیتے وی آپݨا کردار ادا کریندا رہسی، جنوبی ایشیا اچ امن اتے تعاون دے بغیر ترقی ممکن کائنی۔ انہاں بھارت تے زور ݙتا جو او سندھ طاس معاہدے دیاں آپݨیاں ذمے واریاں پوریاں کرے۔ سینیٹ سیکرٹریٹ توں جاری کیتے ڳئے بیان موجب سری لنکا دے پاکستان اچ نویں ہائی کمشنر ریئر ایڈمرل (ر) ایچ ایل اے ڈان فریڈ سینویراتنے چیئرمین سینیٹ پاکستان سید یوسف رضا گیلانی نال انہاں دی رہائش گاہ تے ملاقات کیتی۔ ایں موقع تے سپیکر قومی اسمبلی سردار ایاز صادق وی موجود ہن۔ چیئرمین سینیٹ ہائی کمشنر کوں پاکستان اچ سفارتی ذمے واریاں سنبھالݨ تے مبارخ ݙتی اتے نیک خواہشات دا اظہار کیتا۔ انہاں ایں اعتماد دا اظہار کیتا جو پاکستان اتے سری لنکا دے وچال 70 سال توں ودھ عرصے تے مشتمل تاریخی اتے دوستانہ تعلقات مزید تکڑے تھیسن اتے مختلف شعبیں اچ عملی تعاون کوں نواں رُخ مِلسی۔ سید یوسف رضا گیلانی آکھیا جو پاکستان، سری لنکا کوں خطے دا ہک اہم اتے قابل اعتماد سنڳتی سمجھدے۔ پاکستان اتے سری لنکا دے بھائی چارے آلے تعلقات آپت دے اعتماد، احترام اتے تعاون دی اُچی مثال ہن۔ چیئرمین سینیٹ خطے اچ تعاون دے ودھارے تے زور ݙیندیں آکھیا جو جنوبی ایشیائی ملکاں دی تنظیم سارک کوں فعال بݨاوݨا ضروری اے تاں جو سانجھی خوشحالی، امن اتے علاقائی رابطیں دے مقاصد حاصل کیتے ونڄ سڳن۔ چیئرمین سینیٹ آپݨے گزریل سرکاری دورے سری لنکا دا حوالہ ݙیندیں آکھیا جو اعلیٰ سطح دی اڳواݨی دے تبادلے ݙوہیں ملکاں دے تعلقات کوں مزید مضبوط کریندن اتے اے سلسلہ مستقبل اچ وی جاری رہݨا چاہیدے۔ دفاعی تعاون تے ڳالھ کریندیں چیئرمین سینیٹ آکھیا جو پاکستان اتے سری لنکا وچال فوجی تعلقات ٻہوں اہمیت رکھیندن ۔انہاں تربیتی پروگرامز، اُتلی سطح دے دوریں اتے عسکری اوزاراں دی فراہمی دے حوالے نال جاری تعاون تے اطمینان دا اظہار کیتا اتے ایں کوں مزید ودھاوݨ دی لوڑھ تے زور ݙتا۔ ملاقات اچ تعلیمی و ثقافتی تعلقات کوں وی نمایاں حیثیت ݙتی ڳئی۔ چیئرمین سینیٹ ایں عزم دا اعادہ کیتا جو پاکستان نہ صرف ثقافتی رابطیں کوں ودھیسی بلکہ ٹیکسلا، تخت بھائی اتے وادی سوات اچ موجود سانجھے بدھ مت ورثے دے علاقیں کوں محفوظ بݨاوݨ اتے عوامی سطح تے رابطے ودھاوݨ کیتے وی آپݨا کردار ادا کریندا رہسی۔ چیئرمین سینیٹ بطور وزیراعظم آپݨے دور حکومت کوں یاد کریندیں آکھیا جو پاکستان ہمیشہ ہمسایہ ملکاں نال پُرامن مذاکرات اتے تعمیری رابطے چاہندا رہیے۔ انہاں بین الپارلیمانی تعلقات کوں مزید تکڑا بݨاوݨ تے زور ݙتا اتے سری لنکن اڳواݨی کوں نومبر 2025ء اچ پاکستان اچ تھیوݨ آلی سپیکرز کانفرنس اچ شرکت دی دعوت ݙتی۔ ہائی کمشنر سینویراتنے گرمجوشی نال خوش آمدید کرݨ تے شکریہ ادا کیتا اتے آکھیا جو سری لنکا، پاکستان کوں ہک اہم علاقائی سنگتی سمجھدے اتے مختلف شعبیں اچ آپت تعلقات کوں ودھاوݨ چاہندے۔ انہاں پاکستان دے تعمیری کردار دی تعریف کریندے آکھیے پاکستان اچ موجود بدھ مت ورثے دی وجہ نال مذہبی سیاحت کوں ودھاوݨ دی وݙی گنجائش اے، جیڑھا ݙوہیں ملکاں دے عوام کوں مزید نیڑے گھن آسڳدی اے۔ ملاقات دے اختتام تے چیئرمین سینیٹ ہائی کمشنر کیتے نیک خواہشات دا اظہار کیتا۔
