راولپنڈی۔29اگست (اے پی پی) آرمی چیف فیلڈ مارشل سید عاصم منیر پنجاب دے چھل متاثرہ علاقیں اچ فوجی جواناں اتے سول انتظامیہ دیاں مربوط اتے اوکھیاں کوششاں دی تعریف کیتی انہاں یقین ݙیوائے جو چھل دے دوران متاثر تھیوݨ آلے سارے مذہبی مقامات بشمول دربار صاحب کرتارپور کوں پہلی ترجیح تے اصل حالت اچ بحال کیتا ویسی۔ آئی ایس پی آر توں جاری کیتے ڳئے بیان موجب فیلڈ مارشل سید عاصم منیر، نشان امتیاز (ملٹری)، ہلال جرات پنجاب دے چھل آلے علاقیں بشمول سیالکوٹ سیکٹر، شکرگڑھ، نارووال اتے کرتارپور دا دورہ کیتا۔ ایں دورے دا مقصد چھل دی صورتحال اتے جاری ریسکیو و ریلیف سرگرمیاں دا جائزہ گھنݨا ہئی۔ چیف آف آرمی سٹاف کوں موجودہ صورتحال اتے مینھ دے اڳلے مرحلے کیتے تیاریاں تے جامع بریفنگ ݙتی ڳئی۔ آرمی چیف فوجی جواناں اتے سول انتظامیہ دیاں مربوط اتے اوکھیاں کوششاں دی تعریف کیتی جیڑھے متاثرہ علاقیں اچ عوام دی جان بچاوݨ اتے امداد ݙیوݨ اچ مصروف ہن۔ آرمی چیف علاقے دی متاثرہ سکھ برادری نال وی ملاقات کیتی اتے انہاں کوں یقین ݙیوایا جو چھل دے دوران متاثر تھیوݨ آلے سارے مذہبی مقامات بشمول دربار صاحب کرتارپور کوں پہلی ترجیح تے اصل حالت اچ بحال کیتا ویسی۔ انہاں اے ڳالھ وی آکھی جو اقلیتاں اتے انہاں دے مذہبی مقامات دے تحفظ دی ذمے واری ریاست اتے ایں دے اداریں دی اے اتے ریاستِ پاکستان آپݨی اے ذمے داری کوں نبھاوݨ اچ کوئی گھٹکی نہ چھوڑیسی۔ سکھ برادری سیالکوٹ سیکٹر دے چھل آلے علاقیں اچ آرمی چیف دے آوݨ تے بھرپور استقبال کیتا اتے آفت دے دوران سول انتظامیہ اتے فوج دی طرفوں ݙتی ونڄݨ آلی خدمتاں تے شکریہ ادا کیتا۔ چیف آف آرمی سٹاف دربار صاحب کرتارپور دا فضائی معائنہ وی کیتا۔ سول انتظامیہ دے نمائندیں نال ڳالھ مہاڑ دے دوران آرمی چیف وختی ردعمل دی تعریف کیتی جیں پاروں جانی و مالی ضیان گھٹ تھیا۔ جواناں نال ملاقات دے دوران چیف آف آرمی سٹاف انہاں دے اُچے حوصلے، آپریشنل تیاری اتے قوم دی خدمت دے جذبے دی تعریف کیتی۔ انہاں اوکھے حالات اچ ریسکیو اتے ریلیف آپریشنز دے دوران عوام دی خدمت کرݨ تے فوجی جواناں دی خدمتاں کوں خراج تحسین پیش کیتا۔ فیلڈ مارشل سید عاصم منیر دے آوݨ تے کور کمانڈر گوجرانوالہ انہاں دا استقبال کیتا۔
