اسلام آباد۔29 اگست(اے پی پی)وزیر اعظم محمد شہباز شریف عوامی جمہوریہ چین دے صدر شی جن پنگ دی دعوت تے 30 اگست توں 4 ستمبر 2025 تئیں چین دا سرکاری دورہ کریسن۔ وزیر اعظم اپݨے دورے اچ تیانجن اچ تھیوݨ آلے شنگھائی تعاون تنظیم (ایس سی او) دے سربراہانِ مملکت دے اجلاس اچ پاکستان دی نمائندگی کریسن۔ دفتر خارجہ ولوں جاری بیان موجب وزیر اعظم محمد شہباز شریف دورہ چین اچ عوامی جمہوریہ چین دے صدر شی جن پنگ اتے وزیر اعظم لی چیانگ نال انڄھ انڄھ ملاقاتاں کریسن جنہاں اچ پاکستان اتے چین وچال ݙو طرفہ تعاون دے مختلف پہلواں تے ڳالھ مہاڑ کیتی ویسی۔ ڳالھ مہاڑ اچ اقتصادی شراکت داری، سی پیک دے اڳلے مرحلے دی پیشرفت اتے علاقائی و عالمی امور شامل ہن۔ بیجنگ اچ وزیر اعظم شہباز شریف ݙوجھی عالمی جنگ دی فتح دی 80 ویں سالگرہ دے موقعے تے تھیوݨ آلی خصوصی فوجی پریڈ اچ صدر شی جن پنگ اتے ٻئے عالمی رہنماواں نال شرکت کریسن۔ وزیر اعظم معروف چینی سرمایہ کاراں، کاروباری شخصیات اتے کمپنیاں دے سربراہان نال وی ملاقات کریسن تانجو پاک-چین تجارتی و اقتصادی تعلقات کوں ودھایا ونڄے۔ او بیجنگ اچ تھیوݨ آلی پاک-چین بی ٹو بی سرمایہ کاری کانفرنس نال وی خطاب کریسن۔ اے دورہ پاکستان اتے چین وچال اعلیٰ سطح دی قیادت دے مسلسل تبادلیاں دا تسلسل اے جیڑھا ݙوہاں ملکاں دی ہمیشہ تئیں رہݨ آلی سٹریٹیجک تعاون تے مبنی شراکت داری کوں ٻیا ودھاوݨ، سی پیک دے ݙوجھے مرحلے کوں ودھاوݨ اتے اہم علاقائی و عالمی امور تے قریبی رابطہ برقرار رکھݨ دی اہمیت کوں اڳونہا کریندے۔
