لاہور۔30اگست (اے پی پی) وزیراعظم محمد شہباز شریف چین دے سرکاری دورے تے تیانجن روانہ تھی ڳئے۔ وزیراعظم دفتر دے میڈیا ونگ توں جاری بیان موجب چین دے صدر شی جن پنگ وزیراعظم کوں چین دے دورے دی دعوت ݙتی اے، نائب وزیراعظم اتے وزیر خارجہ محمد اسحاق ڈار، وزیر اطلاعات و نشریات عطا اللہ تارڑ اتے وزیر اعظم دے مشیر طارق فاطمی وی نال ہن۔ وزیراعظم آپݨے دورے اچ 25 ویں شنگھائی تعاون تنظیم سربراہی اجلاس اچ شرکت اتے خطاب کریسن، او پاکستان دی خطے اچ امن دیاں کوششاں، علاقائی رابطیں اچ ودھارے اتے خطے دی عوام دی ترقی کوں ودھاوݨ دے حوالے نال پاکستان دا موقف وی پیش کریسن۔ محمد شہباز شریف خطے اچ موجود ملکاں تے موسمیاتی تبدیلی دے بُرے اثرات بشمول ودھدیاں ہوئیاں قدرتی آفتاں دے نویں چیلنجز تے روشنی پیسن۔ وزیرِاعظم سربراہی اجلاس اچ شریک عالمی اڳواݨاں نال ملاقاتاں وی کریسن۔ بعد اچ وزیر اعظم چین دے دارالحکومت بیجنگ ویسن جتھاں او صدر شی جن پنگ دی خصوصی دعوت تے چینی پیپلز وار آف ریزسسٹنس اچ فتح دی 80 ویں سالانہ تقریباں اچ شرکت کریسن۔ وزیرِاعظم دی چینی صدر شی جن پنگ اتے وزیرِاعظم لی چیانگ نال ݙو طرفہ ملاقاتاں وی ہوسن۔ وزیرِ اعظم چین پاکستان تجارتی تعلقات دے ودھارے اتے پاکستان اچ چینی سرمایہ کاری اچ ودھارے کیتے چین اچ منعقدہ ݙوجھی بزنس ٹو بزنس سرمایہ کاری کانفرنس دی اڳواݨی وی کریسن۔ وزیرِاعظم محمد شہباز شریف چینی کمپنیاں دے سربراہیں نال ملاقاتاں کریسن اتے انہاں کوں حکومت دیاں سرمایہ کار دوست پالیسیاں بارے آگاہی دے نال نال پاکستان اچ سرمایہ کاری دی دعوت وی ݙیسن
