لاہور۔30اگست (اے پی پی) پی ڈی ایم اے پنجاب دریائے راوی، ستلج اتے چناب اچ چھل پاروں تھیوݨ آلے ضیان دی رپورٹ جاری کرݙتی ۔ دریائے راوی، ستلج تے چناب اچ زور دی چھل دی صورتحال پاروں 2308 موضع جات اتے کُل 15 لکھ 16 ہزار لوک متاثر تھئن۔ ایں حوالے نال ریلیف کمشنر پنجاب نبیل جاوید آکھیا جو چھل اچ پھسݨ آلے 4 لکھ 81 ہزار لوکاں کوں محفوظ علاقیں تے منتقل کیتا ڳیا، زور دی چھل پاروں متاثرہ ضلعیں اچ 511 ریلیف اتے 351 میڈیکل کیمپس وی بݨائے ڳئن ۔ ایویں مال ڈھورکوں علاج دی سہولت ݙیوݨ کیتے 321 ویٹرنری کیمپس بݨائے اتے متاثرہ ضلعیں اچ ریسکیو ریلیف سرگرمیاں اچ 4 لکھ 5 ہزار زناوراں کوں محفوظ علاقیں تے منتقل کیتا ڳئے۔ ریلیف کمشنر پنجاب آکھیا جو دریائے چناب مرالہ دے علاقے تے پاݨی 1 لکھ 11 ہزار کیوسک ریکارڈ کیتا ڳئے، ایویں خانکی ہیڈ ورکس دے علاقے تے پاݨی 1 لکھ 70 ہزار کیوسک، قادر آباد دے علاقے تے 1 لکھ 71 ہزار کیوسک اتے ہیڈ تریموں دے علاقے تے پاݨی 1 لکھ 46 ہزار 80 اے جیں اچ مسلسل ودھارا تھیندا پئے۔ ریلیف کمشنر پنجاب آکھیا جو دریائے راوی جسڑ دے علاقے تے پاݨی 78 ہزار کیوسک، شاہدرہ دے علاقے تے ہک لکھ 38 ہزار کیوسک اتے وہݨ اچ گھٹکی آندی پئی اے ۔ ایویں بلوکی ہیڈ ورکس تے پاݨی 1 لکھ 99 ہزار کیوسک اے اتے ودھارا تھیندا پئے جݙاں جو دریائے راوی ہیڈ سدھنائی دے علاقے تے پاݨی دا آوݨ 32 ہزار اتے نکلݨ 18 ہزار کیوسک اے۔ ریلیف کمشنر پنجاب آکھیا جو دریائے ستلج اچ گنڈا سنگھ والا دے علاقے تے پاݨی 3 لکھ 3 ہزار کیوسک اے اتے وہݨ اچ ودھارا تھیندا پئے، سلیمانی دے علاقے تے پاݨی دا وہݨ 1 لکھ 38 ہزار کیوسک اے۔ انہاں آکھیا جومنگلا ڈیم 80 فیصد جݙاں جو تربیلا ڈیم 100 فیصد تئیں بھر چُکئے، بھارت اچ پونگ ڈیم 94 فیصد اتے تھین ڈیم 92 فیصد تئیں بھر چُکئے جݙاں جو دریائے ستلج تے موجود انڈین بھاکڑا ڈیم 84 فیصد تئیں بھر چُکئے۔ انہاں آکھیا جو اڄوکی چھل پاروں ٻݙݨ نال 30 شہری فوت تھی ڳئن اتے لاہور اچ آسمانی بجلی ڈھݨ نال 2 اموات رپورٹ تھئن۔ انہاں آکھیا جو وزیر اعلیٰ پنجاب دی ہدایت موجب شہریاں اتے زمینداراں دے ضیان دا اندازہ لا تے ازالہ یقینی بݨایا ویسی۔ نبیل جاوید آکھیا جو گزریل 24 گھنٹےاچ پنجاب دے ٻہوں سارے ضلعیں اچ ساوݨ مینھ ریکارڈ کیتا ڳیا، رپورٹ موجب منڈی بہاؤالدین اچ 81 ملی میٹر، حافظ آباد 63، جہلم 50، سیالکوٹ 47، بہاول نگر 44، گجرات 34، فیصل آباد 32، شیخوپورہ 31، لاہور 26، چکوال 18، گوجرانوالہ 14، خانیوال 12 اتے جھنگ اچ 10 ملی میٹر مینھ ریکارڈ کیتا ڳئے۔ایویں راولپنڈی، کوٹ ادو، ساہیوال، سرگودھا اتے قصور اچ وی مینھ ریکارڈ کیتا ڳئے۔ انہاں آکھیا جو آوݨ آلے 24 گھنٹےاچ پنجاب دے ٻہوں سارے ضلعیں اچ ساوݨ مینھ دا امکان اے ساوݨ دے مینھ دا 9 واں سپیل 2 ستمبر تئیں جاری رہسی۔
