اسلام آباد۔30اگست (اے پی پی) پاک فوج دا جھنگ، فیصل آباد، چنیوٹ اتے ٹوبہ ٹیک سنگھ اچ ریسکیو آپریشن جاری اے، پنجاب دے چھل آلے علاقیں اچ پاک فوج دے دستے ریسکیو اینڈ ریلیف آپریشن اچ مصروف عمل ہن۔ پاک فوج دی طرفوں آبادی کوں بچاوݨ کیتے جھنگ اتے فیصل آباد اچ ترائے علاقیں تے بند کوں بھن ݙتا ڳئے ۔ بند بھنݨ دے بعد ھک توں ݙڈھ لکھ کیوسک پاݨی تلے دی سائیڈ منتقل تھی ڳئے۔ پاک فوج دے جوان متاثرین چھل کوں ہیلی کاپٹر اتے ٻیڑیاں دے ذریعے محفوظ علاقیں تے منتقل کریندے پئن۔ فیصل آباد دیاں متاثرہ وستیاں اچ پھتے 15 ہزار 800 لوکاں اچوں 14 ہزار 50 لوکاں کوں ریسکیو کر ڳھدا ڳئے۔ ریسکیو کیتے ونڄݨ آلے لوکاں اچ بُڈھے شہری، ٻال اتے تریمتاں وی شامل ہن۔ ایویں تحصیل تاندلیانوالہ اچ چھل متاثرین کیتے 5 ریلیف کیمپس، 18 میڈیکل کیمپس اتے 6 ریسکیو کیمپس فعال ہن جݙاں جو ٹوبہ ٹیک سنگھ اچ وی پاک فوج دے ریسکیو 1122 دے نال رَل تے ریسکیو اینڈ ریلیف کیمپس بݨا ݙتے ڳئن۔ ریلیف کیمپس اچ پاک فوج دی طرفوں چھل متاثرین کوں ضروری طبی مدد اتے مفت دوائیں ݙتیاں ویندیاں پئن۔ پاک فوج دی چھل دے پاݨی توں وقتی نکلݨ اتے متاثرہ وستیاں اچ ریلیف سرگرمیاں مزید تِکھیاں کرݙتیاں ڳئن۔ متاثرین چھل دی طرفوں پاک فوج دے ریسکیو اینڈ ریلیف آپریشن دی تعریف کیتی ویندی پئی اے ۔ اوکھے ویلھے پاک فوج عوام دے نال کھڑی اے۔
