اسلام آباد۔30اگست (اے پی پی) وزیراعظم محمد شہباز شریف دی ہدایت تے نیشنل ڈیزاسٹر مینجمنٹ اتھارٹی (این ڈی ایم اے) دی چھل آلے علاقیں اچ ریلیف و ریسکیو آپریشن کیتے مدد جاری اے، پی ڈی ایم اے پنجاب دی درخواست تے چھل متاثرین کیتے راشن دی ترسیل کیتی ڳئی، سیالکوٹ دے چھل توں متاثرہ علاقیں کیتے 500 اتے نارووال کیتے 500 راشن بیگز ݙتے ڳئن۔ این ڈی ایم اے موجب امدادی سامان دے راشن بیگز 46 کلوگرام اتے 22 چیزاں تے مشتمل ہن۔ امدادی سامان متعلقہ ضلعی انتظامیہ دے ذریعے ونڈیا ویسی۔ این ڈی ایم اے سیالکوٹ اتے نارووال کیتے امدادی سامان تے مشتمل کل 8 ٹرکاں دا قافلہ روانہ کر ݙتے جݙاں جو وزیرآباد، حافظ آباد، چنیوٹ اتے جھنگ کیتے راشن ٹرک آوݨ آلے کجھ ݙینھ اچ روانہ کیتے ویسن۔ این ڈی ایم اے وزیرآباد اچ 500، حافظ آباد اچ 500، چنیوٹ اچ 1000 اتے جھنگ اچ 1200 راشن پیک دی ترسیل دا منصوبہ تیار کیتے۔ این ڈی ایم اے سویرے وی 4 ہزار 200 راشن بیگز پنجاب دے آفت زدہ علاقیں اچ بھیجیسی، امدادی راشن پیک چھل متاثرہ خانداناں دیاں وقتی ضرورتاں پوریاں کرݨ کیتے تیار کیتے ڳئن، انہاں اچ بنیادی غذائی چیزاں اتے ݙوجھیاں ضرورتاں شامل ہن۔ این ڈی ایم اے صوبائی حکومت اتے متعلقہ ادارہ امدادی سرگرمیاں دی نگرانی کریندا پئے۔
