اسلام آباد۔29اگست (اے پی پی) قومی اسمبلی دی قائمہ کمیٹی اطلاعات و نشریات قومی خبر رساں ادارے ایسوسی ایٹڈ پریس آف پاکستان (اے پی پی) دے مینیجنگ ڈائریکٹر محمد عاصم کھچی دی طرفوں ادارے اچ ارباں روپے دی کرپشن بے نقاب کرݨ تے انہاں دی ایمانداری اتے بہادری دی تعریف کیتی ڳئی اے ۔ کمیٹی دا اجلاس رُکن قومی اسمبلی پلّین بلوچ دی اڳواݨی اچ تھیا۔ کمیٹی ایم ڈی اے پی پی کوں بطور “وسل بلوور” خراجِ تحسین پیش کریندیں ادارے دے اندر کرپشن دے منظم نیٹ ورک کوں بے نقاب کرݨ تے انہاں دے کردار دی تعریف کیتی اے۔ کمیٹی دے چیئرمین پلین بلوچ احتساب دے عمل کوں غیر ضروری طور تے لمبا نہ کرݨ تے زور ݙیندیں کمیٹی دی طرفوں لُٹیے ڳئے عوامی فنڈز دی ریکوری اتے ملزماں کوں انصاف دی کچاری اچ گھن آوݨ کیتے مکمل تعاون دا یقین ݙیوایا۔ وفاقی سیکرٹری اطلاعات عنبرین جان وی ایم ڈی اے پی پی محمد عاصم کھچی دی ایمانداری دی تعریف کیتی تے شفافیت و ادارہ جاتی احتساب کیتے آپݨی وزارت دی مکمل حمایت دا اعادہ کیتا۔ رُکن کمیٹی کرن ڈار ایم ڈی اے پی پی دے اصلاحاتی ایجنڈے دی حمایت کریندیں آکھیا جو ادارے دی شفافیت اچ ودھارا ویلھے دی لوڑھ اے۔ ایم کیو ایم دے سید امین الحق پُچھیا جو کیا ایم ڈی کوں کرپٹ مافیا توں تڑیاں ملئن؟ انہاں اتے ݙوجھے ارکان ہر طرح دے دٻاؤ دے خلاف ایم ڈی اے پی پی دی جدوجہد اچ بغیر ہلݨ دے تعاون دا عزم اظہار کیتا۔ اجلاس اچ متفقہ طور تے فیصلہ کیتا ڳیا جو میڈیا متعلق سارے اداریں اچ شفافیت اتے احتساب کوں یقینی بݨایا ویسی اتے ایم ڈی اے پی پی کوں ہدایت کیتی ڳئی جو لُٹیے ڳئے فنڈز دی بحالی کیتے سارے ضروری اقدامات کرے۔ ایں توں پہلے کمیٹی کوں بریفنگ ݙیندیں ایم ڈی اے پی پی محمد عاصم کھچی ݙسایا جو ادارے دی سطح تے تحقیقات اچ پی ایس ڈی پی فنڈڈ منصوبے اچ 1.24 ارب روپے توں ودھ دی گڑبڑ سامݨے آئی اے۔ ملازماں متعلقہ خرچے، نقلی بھرتیاں اتے پروویڈنٹ فنڈ اچ وی بے قاعدگیاں ملیاں جیں تے ایف آئی اے گزریل ایگزیکٹو ڈائریکٹرز، مینیجرز اتے کلریکل سٹاف سودھے 16 لوکاں دے خلاف مقدمہ درج کیتے۔ انہاں اے پی پی دے مختلف شعبیں دے کماں بارے ݙسایا جو اے پی پی دی ویب سائٹ توں سالانہ 24 لکھ روپے دی آمدݨ ملدی پئی اے جیں نال ادارے دی ودھدی ہوئی ڈیجیٹل آمدݨ دی اہلیت دی عکاسی تھیندی اے۔ انہاں ݙسایا جو اے پی پی دی ویب سائٹ کوں لوکل سرور تے منتقل کر ݙتا ڳئے جیں نال سالانہ نو ہزار ڈالر دی بچت تھیسی، ویب سائٹ دے امپریشنز 85 ملین ریکارڈ کیتے ڳئن، فیس بک تے پہنچ ہک کروڑ 3 لکھ، ٹک ٹاک تے پہنچ ہک کروڑ، ایکس تے 15 لکھ، انسٹاگرام تے 3 لکھ 19 ہزار پہنچ ریکارڈ کیتی ڳئی اتے یوٹیوب ہک لکھ 37 ہزار تھی چُکئے۔ اے پی پی خبراں جاری کرݨ اتے انہاں کوں ویب سائٹ تے اپ لوڈ کرݨ دے ایں تسلسل کوں برقرار رکھیے، روزانہ 350 توں 400 خبراں ویب تے شائع کیتیاں ویندن۔ انہاں کمیٹی ارکان کوں ݙسایا جو 11 غیر ملکی نیوز ایجنسیاں دے نال مفاہمت دیاں یادداشتاں تے دستخط سانڳے کابینہ دی منظوری دا انتظار اے۔ ایم ڈی اے پی پی کمیٹی کوں ݙسایا جو ڈگری ویریفکیشن کمیٹی جانچ پڑتال دا عمل تقریباً مکمل کرڳھدے اتے نقلی ڈگری رکھݨ آلے لوکاں دے خلاف سخت کارروائی تھیسی ۔ ایویں پنشنرز کیتے ہر چھی مہینے بعد لائف سرٹیفکیٹ” جمع کراوݨ لازمی قرار ݙتا ڳئے جݙاں جو گزریل ترائے وفاقی بجٹ اچ اعلان کیتے ڳئے پنشن ودھارے کوں شامل کرݨ کیتے فنانس ڈویژن دے سامݨے 30 کروڑ روپے دا مطالبہ رکھیا ڳئے۔ ایم ڈی اے پی پی آکھیا جو آمدݨ ودھاوݨ کیتے ٻہوں ساریاں حکمت عملیاں تیار کیتیاں ڳئن اتے سالانہ 20 کروڑ روپے تئیں دی آمدݨ دی توقع اے۔ سیکرٹری اطلاعات عنبرین جان کمیٹی کوں ݙسایا جو پاکستان ٹیلی ویژن کارپوریشن (پی ٹی وی) اچ آپریشنل کارکردگی بہتر بݨاوݨ کیتے اصلاحات جاری ہن۔ پی ٹی وی ملازماں دے بقایا جات دی ادائیگی کیتے 11 ارب روپے دی منظوری ݙتی ڳئی اے اتے مزید 4.5 ارب روپے دے مطالبے دی تیاری کیتی ویندی پئی اے۔ انہاں ݙسایا جو مستقل، کنٹریکٹ اتے ڈیلی ویجز ملازماں دیاں تنخواہیں 25 جون تئیں ادا کرݙتیاں ڳئن۔ پریس انفارمیشن کمیشن (پی آئی سی) دے نمائندے ݙسایا جو گزریل اَٹھ سال اچ 6 ہزار 340 شکایتاں ملیاں جنہاں اچوں 5 ہزار 435 نبیڑݙتیاں جݙاں جو 905 زیر التواء ہن۔ 268 اپیلیں مختلف ہائی کورٹس اچ سݨوائی دے مرحلیں اچ ہن۔ پرنسپل انفارمیشن افسر مبشر حسن کمیٹی کوں ݙسایا 14 اگست دیاں تقریباں کوں ‘معرکہ حق’ دی یادگار دے نال جوڑیا ڳیا۔ یوم آزادی دے موقع تے سرکاری اشتہار اچ قائد اعظم دی تصویر نہ ہووݨ متعلق انہاں ݙسایا جو او آئی سی دی اوور سائٹ امپلیمینٹیشن کمیٹی آپݨی تحقیقات مکمل کرڳھدن جیں اچ پتہ لڳا جو 14 اگست دے اشتہار دے منظور شدہ مواد اچ قائداعظم محمد علی جناح دی تصویر شامل کائناں ہئی۔ ایڈورٹائزنگ ایجنسی ایں گھٹکی کوں قبول کریندیں آپݨی غلطی منی، تاں جو کمیٹی قائداعظم دی اہمیت دے پیش نظر ایں معذرت کوں ناکافی قرار ݙتا۔ پی آئی او مزید ݙسایا جو 25-2024 دے اخبارات دے بقایا جات ایں سال ستمبر تئیں ادا کر ݙتے ویسن۔ اجلاس اچ سینیٹر سحر کامران، امین الحق، عاصیہ ناز تنولی، رانا انصر، کرن ڈار، شاہین اتے صلاح الدین جونیجو شرکت کیتی۔ مہتاب اکبر راشدی اجلاس اچ آن لائن شرکت کیتی۔
