اسلام آباد۔30اگست (اے پی پی) وفاقی وزیر بحری امور محمد جنید انور چوہدری آکھیے جو پاکستان دی طرفوں امریکا کوں مچھی اتے مچھی دیاں مصنوعات دی برآمد اچ مزید چار سال دی توسیع دا اختیار مِل ڳئے۔ وزارت بحری امور موجب آپݨے بیان اچ وفاقی وزیر آکھیا جو اے فیصلہ پاکستان دے سمندری غذا دے معیار دی بین الاقوامی شناخت کوں ظاہر کریندے اتے شعبے کوں لمبے ویلھے دا استحکام ݙیسی، امید اے جو ایں توسیع نال سمندری غذا دی عالمی منڈی اچ اساݙی پوزیشن کوں طاقت مِلسی جیں نال دنیا دے ساریں توں وݙے سمندری غذا دے درآمد کنندگان تئیں رسائی ملسی۔ انہاں وضاحت کیتی جو امریکا دی نیشنل اوشینک اینڈ ایٹموسفیرک ایڈمنسٹریشن میرین میمل پروٹیکشن ایکٹ دے تحت غیر ملکی ماہی گیری دی فہرست اچ شامل سارے پاکستانی ماہی گیراں دی مقابلے دے طور تے درجہ بندی کیتی اے۔ جنید انور چوہدری آکھیا جو اے درجہ بندی ایں ڳالھ دی تصدیق کریندی اے جو پاکستان دی ماہی گیری دی صنعت سمندری جانوراں کوں ماہی گیری دے دوران حادثاتی اموات اتے شدید چوٹاں توں بچاوݨ کیتے امریکی معیار تے پورا لَہندی اے۔ انہاں آکھیا جو ایں ویلھے پاکستانی سمندری غذا عالمی مارکیٹ اچ تقریباً 2 امریکی ڈالر فی کلوگرام وکدی اے، ایں بین الاقوامی منظوری دے نال قیمت اچ ودھارے دا امکان اے اتے پاکستانی برآمد کنندگان کیتے یورپ اتے خلیج اچ نویں منڈیاں کھلسن۔ انہاں آکھیا جو گزریل مالی سال 25-2024 اچ پاکستان 242,484 میٹرک ٹن مچھی اتے ایں دیاں مصنوعات دی برآمدات توں 489.2 ملین ڈالر زرمبادلہ کمایا اتے اوسطاً 2 امریکی ڈالر فی کلوگرام دے حساب نال برآمدات کیتیاں جݙاں جو ایں مالی سال اچ قومی برآمدات دا حجم توں تقریباً 600 ملین ڈالر تئیں ودھݨ دی توقع اے۔ انہاں ایں ڳالھ تے زور ݙتا جو اے منظوری امریکی منڈی اچ پاکستان دی کروڑاں ڈالر دی سمندری خوراک دیاں برآمدات دے تحفظ کیتے ٻہوں ضروری اے اتے ایں دے نال دنیا اچ ذمے دارانہ اتے پائیدار ماہی گیری دے انتظام کیتے ملک دی ساکھ اچ وی ودھارا کریندی اے۔ انہاں سمندری جانوراں دی آبادی کیتے حفاظتی اقدامات کوں مسلسل مضبوط کرݨ دی اہمیت تے وی زور ݙتا اتے آکھیا جو سمندری حیاتیاتی تنوع دی لمبے ویلھے دی صحت کوں یقینی بݨایا ونڄے۔
