راولپنڈی۔30اگست (اے پی پی) وفاقی وزیر ریلوے محمد حنیف عباسی آکھیے جو ہک ہزار بستریں تے مشتمل راولپنڈی ڈویژن دا پہلا مدر اینڈ چلڈرن ہسپتال ایں سال مکمل تھیندا پئے جیڑھا شہریاں کیتے ہک وݙا تحفہ ہوسی۔او گورنمنٹ وقار النساء کالج راولپنڈی اچ ہک تقریب نال خطاب کریندے پئے ہن جیں اچ رُکن قومی اسمبلی طاہرہ اورنگزیب، رُکن صوبائی اسمبلی محمد حنیف ایڈووکیٹ، ضیاء اللہ شاہ، پرنسپل کالج، استاداں اتے طالب علماں دی وݙی تعداد شریک ہئی۔ حنیف عباسی آکھیا جو مسلم لیگ (ن) دی حکومت صحت، تعلیم، صفائی سودھے سارے شعبیں اچ انقلابی اقدامات کیتن۔ انہاں آکھیا جو اڳواݨ او ہوندا اے جیڑھا عمل نال ثابت کرے، صرف ڳالھیں اتے کوڑے وعدیں نال نی۔ انہاں دا آکھݨا ہئی جو وزیراعظم شہباز شریف عوامی خدمت اچ کوئی گھٹکی نی چھوڑی اتے خاص طور تے صحت دے شعبے اچ نویاں سہولتاں ݙیوݨ انہاں دی پہلی ترجیح اے۔ انہاں ݙسایا جو راولپنڈی انسٹیٹیوٹ آف کارڈیالوجی (آر آئی سی) قومی اثاثہ اے جیڑھا پورے ملک دے مریضاں داعلاج کریندا پئے جنہاں اچوں 60 فیصد مریض خیبرپختونخوا اتے ݙوجھے علاقیں توں آندن۔ وزیر ریلوے اعلان کیتا جو اڄوکے سال نومبر اچ راولپنڈی انسٹیٹیوٹ آف یورولوجی اچ کڈنی اتے لیور ٹرانسپلانٹ دا آغاز تھی ویسی۔ انہاں آکھیا جو ہک ہزار بستریں تے مشتمل راولپنڈی ڈویژن دا پہلا مدر اینڈ چلڈرن ہسپتال 7 ارب روپے دی لاڳت نال اڄوکے سال مکمل تھیوݨ ویندا پئے۔ اے منصوبہ کئی سالاں توں نامکمل ہئی۔ انہاں آکھیا جو وزیراعظم شہباز شریف اتے فیلڈ مارشل جنرل عاصم منیر دی اڳواݨی اچ پاکستان معیشت اتے خارجہ پالیسی اچ نمایاں کامیابیاں حاصل کیتن اتے اڄ عالمی سطح تے ملک کوں عزت و وقار مِلئے۔ اڄ امریکا وی پاکستان دی تعریف کریندا پئے۔ انہاں آکھیا جو پاکستان آپݨے توں کئی گنا وݙے ملک کوں ہراوݨ بہادری دا سکہ منوایا۔ افواج پاکستان دی بہادری اتے جرات ہندوستان کوں ہرایا اتے اڄ دشمن آپݨے زخم چٹیندا پئے۔ انہاں پاکستانی شاہیناں دے کارنامے کوں خراج تحسین پیش کیتا اتے آکھیا جو اساں کوں آپݨے شہداء تے ماݨ اے جنہاں آپݨیاں جاناں دا نذرانہ ݙے تے ملک دا دفاع نہ ہرݨ آلا بݨایا۔ انہاں وزیر اعلیٰ پنجاب مریم نواز دے اقدامات دی تعریف کریندے آکھیےجو انہاں ں روڈ سٹرکچر، صاف ستھرا پنجاب، ٹرانسپورٹ اتے تعلیم دے میدان اچ انقلابی اقدامات چاتن۔ انہاں دا آکھݨا ہئی جو میکوں حلقے دا کوئی سکول یا کالج ایجھا نہ رہ ویسی جیں دا معیار عالمی سطح دا نہ ہووے۔ سکولاں دیاں باؤنڈری والاں، ٹائلٹس اتے ݙوجھیاں سہولتاں ݙیوݨ تے لکھاں، کروڑاں روپے خرچ کیتے ویندے پئن۔ انہاں اعلان کیتا جو حلقے اچ ݙو انٹرنیشنل معیار دے سکول قائم کیتے ویسن جیڑھے پورے پاکستان اچ آپݨی مثال آپ ہوسن۔ انہاں مزید آکھیا جو لاہور ریلوے سٹیشن کوں عالمی معیار موجب بݨا ݙتا ڳئے۔ پاکستان ریلوے چارے صوبیاں کوں جوڑݨ آلی زنجیر اے، جیں نال پختون، بلوچ، سندھی، سرائیکی اتے پنجابی سارے جڑے ہوئن۔ انہاں ݙسایا جو 31 دسمبر 2025 تئیں پاکستان ریلوے اچ نویں نظام متعارف کرا ݙتا ویسی۔ حنیف عباسی آکھیا جو راولپنڈی اچ 80 کلو میٹر لمبی گیس پائپ لائن وِچھائی ویندی پئی اے جیں نال سردیاں اچ عوام کوں ریلیف مِلسی۔ انہاں آکھیا جو وقار النساء کالج تعلیم دے نال نال طالب علماں کوں کھیݙاں دے وی بھرپور موقع ݙیندے اتے اے پاکستان دا واحد کالج اے جتھاں تریمتاں کیتے ہاکی اسٹیڈیم موجود اے۔ انہاں آکھیا جو جیں ہال اچ اج تقریب تھیندی پئی اے ایں دی بنیاد اساں رکھی ہئی اتے قومی ہیرو ڈاکٹر عبدالقدیر خان مرحوم ایں دا سنگ بنیاد رکھیا ہئی۔ آپݨے خطاب چے چھیکڑ اچ انہاں طالب علماں تے زور ݙتا جو او چنڳا دل لا تے تعلیم حاصل کرن، آپݨے ماء پیو اتے استاداں دا احترام کرن کیوں جو ایہو ہی کامیابی اتے ترقی دا اصلی رستہ اے۔
