تیانجن۔30اگست (اے پی پی) وزیراعظم محمد شہباز شریف چین دے سرکاری دورے تے تیانجن پڄ ڳئن جھتاں انہاں دا شاندار استقبال کیتا ڳئے۔ وزیراعظم شنگھائی تعاون تنظیم (ایس سی او) دے سربراہی اجلاس سودھے بیجنگ اچ تھیوݨ آلی چینی عوامی جنگ دی فتح دی 80 ویں سالگنڈھ دی تقریب اتے ݙوجھیاں اہم سرکاری مصروفیات اچ شرکت کریسن۔ وزیراعظم دے نال پاکستانی وفد اچ نائب وزیراعظم / وزیرخارجہ محمد اسحاق ڈار، وفاقی وزیر منصوبہ بندی و ترقی ڈاکٹر احسن اقبال، وزیر اطلاعات و نشریات عطا اللہ تارڑ اتے اعلیٰ سرکاری حکام شامل ہن۔ تیانجن ایئرپورٹ تے چین دے جنرل ایڈمنسٹریشن آف کسٹمز دی سی پی سی کمیٹی دے وزیر اتے سیکرٹری سن میجن، تیانجن میونسپل پیپلز کانگریس دی سٹینڈنگ کمیٹی دے چیئرمین اتے پارٹی سیکریٹری یویونلن، پاکستان اچ چین دے سفیر جیانگ زائیڈونگ اتے چین اچ پاکستان دے سفیر خلیل ہاشمی وزیراعظم دا گرمجوشی نال استقبال کیتا۔ وزیراعظم شہباز شریف 31 اگست توں ہک ستمبر 2025 تئیں تیانجن اچ تھیوݨ آلے شنگھائی تعاون تنظیم دے کونسل آف ہیڈز آف سٹیٹ اجلاس اچ شرکت کریسن اتے اجلاس نال خطاب وی کریسن۔ ایں موقع تے او چین دے صدر شی جن پنگ اتے وزیراعظم لی کیانگ نال ݙو طرفہ ملاقاتاں کریسن جنہاں اچ آپت دے دلچسپی دے معاملے، اقتصادی تعاون اتے خطے دی مجموعی صورتحال تے ڳالھ مہاڑ کیتی ویسی۔ آپݨے دورہ چین دے دوران وزیراعظم ممتاز چینی کاروباری لوکاں نال ملاقاتاں کریسن جݙاں جو 4 ستمبر کوں بیجنگ اچ ݙوجھی پاک چین بی ٹو بی سرمایہ کاری کانفرنس دی اڳواݨی وی کریسن۔ ایں کانفرنس دا مقصد ݙوہیں ملکاں وچال تجارتی اتے سرمایہ کاری دے تعلقات کوں مزید ودھاوݨ اتے آپت دے تعاون دے نویں موقع ڳولݨا اے۔ وزیراعظم شہباز شریف شنگھائی تعاون تنظیم دے اجلاس دے موقع تے ݙوجھے رُکن ملکاں دے سربراہیں نال وی ملاقاتاں کریسن۔
