اسلام آباد۔30اگست (اے پی پی) وزیرِاعظم محمد شہباز شریف چین دے صدرِ شی جن پنگ دی دعوت تے 31 اگست توں ہک ستمبر 2025 تئیں چین دے شہر تیانجن دے دورہ دے دوران شنگھائی تعاون تنظیم (ایس سی او) دے سربراہانِ مملکت کونسل (سی ایچ ایس) اتے سربراہانِ مملکت کونسل پلس (سی ایچ ایس پلس) اجلاس اچ پاکستانی وفد دی اڳواݨی کریسن۔ وزیرِاعظم خطے اتے دنیا دے اہم مسلیں تے پاکستان دا نقطہ نظر پیش کریسن۔ ایس سی او، سی ایچ ایس سربراہی اجلاس اچ رُکن ملکاں دے سربراہانِ مملکت و حکومت شرکت کریسن جنہاں اچ پاکستان، بیلاروس، چین، بھارت، ایران، قازقستان، کرغزستان، روس، تاجکستان اتے ازبکستان شامل ہن۔ ایس سی او، سی ایچ ایس اجلاس ہک ودھائے ڳئے فارمیٹ اچ منعقد تھیسی جیں اچ منگولیا، آرمینیا، آذربائیجان، کمبوڈیا، نیپال، ترکیہ، مصر، مالدیپ، میانمار، ترکمانستان، ملائیشیا، لاؤس، ویتنام اتے انڈونیشیا دے اڳواݨ، اقوام متحدہ دے سیکریٹری جنرل اتے ݙوجھیاں علاقائی و بین الاقوامی تنظیماں دے سربراہان شرکت کریسن۔ ایس سی او، سی ایچ ایس اجلاس اچ وزیرِاعظم شہباز شریف خطے اتے دنیا دے اہم مسئلیں تے پاکستان دا نقطہ نظر پیش کریسن، اتے ایس سی او دے کردار کوں علاقائی تعاون و استحکام دے ودھارے اچ مزید موثر بݨاوݨ کیتے حکمتِ عملیاں تے روشنی پیسن۔ ایس سی او، سی ایچ ایس تنظیم دا ساریں توں اُچا فیصلہ ساز ادارہ اے، جیڑھا سیاسی، سکیورٹی اتے اسٹریٹجک رہنمائی ݙیندے اتے او اعلانات، بیاناں اتے اہم فیصلیں دی منظوری ݙیندے جیڑھا تنظیم دے ایجنڈے دا تعین کریندن۔ ایس سی او، سی ایچ ایس اجلاس ہک تھیم تے مبنی سربراہی اجلاس اے جو سݙیے ڳئے اڳواݨاں دے نال ٻہوں وݙی گالھ مہاڑ کوں ودھیندے اتے علاقائی و عالمی ترجیحاں تے مرکوز ہوندے۔ ایس سی او، سی ایچ ایس اجلاس دے دوران وزیراعظم پاکستان ٻہوں جہتی تعاون، علاقائی سکیورٹی دے ودھارے اتے پائیدار ترقی دے عزم دا اعادہ کریسن۔ سربراہی اجلاس دے موقع تے وزیرِاعظم ایس سی او دے رُکن ملکاں اتے ݙوجھے سݙیے ڳئے اڳواݨاں نال ݙو طرفہ ملاقاتاں وی کریسن، جنہاں دا مقصد آپت دے سفارتی تعلقات کوں مزید تکڑا بݨاوݨا ہوسی۔
