اسلام آباد۔31اگست (اے پی پی) نیشنل ڈیزاسٹر مینجمنٹ اتھارٹی (این ڈی ایم اے) دی طرفوں متاثرہ علاقیں اچ امدادی راشن دی ترسیل جاری اے۔ این ڈی ایم اے صوبائی حکومتاں دے نال رَل تے متاثرہ علاقیں اچ امدادی سرگرمیاں اچ مصروف اے۔ این ڈی ایم اے میڈیا ونگ موجب پنجاب دے متاثرہ علاقیں اچ وقتی طور تے امدادی راشن ݙتا ویندا پئے جݙاں جو پنجاب دے 6 متاثرہ ضلعیں کیتے امدادی راشن دی ترسیل دی حکمت عملی تیار کیتی ڳئی اے۔ این ڈی ایم اے دی نجی شعبے اتے صنعتاں دے تعاون نال قومی وسائل کوں استعمال کریندیں امدادی کاروائیاں جاری ہن۔ اتھارٹی دی طرفوں اتوار کوں وزیرآباد اتے حافظ آباد کیتے امدادی راشن تے مشتمل 4، 4 ٹرکاں دا قافلہ روانہ کر ݙتا ڳئے۔ ہک راشن بیگ دا وزن 46 کلوگرام اتے 22 چیزاں تے مشتمل اے۔ ایویں این ڈی ایم اے نارووال اتے سیالکوٹ اچ امدادی سامان بھجوا چُکئے جݙاں جو چنیوٹ اتے جھنگ کیتے امدادی راشن دی ترسیل دیاں تیاریاں کیتیاں ویندیاں پئن۔ وزیراعظم دی ہدایت تے این ڈی ایم اے مزید امدادی کوششاں دا سلسلہ جاری رکھیسی۔ این ڈی ایم اے متاثرین دی بحالی کیتے پرعزم اے اتے سارے متعلقہ اداریں دے نال رَل تے کم کریندا پئے۔
