تیانجن ۔31اگست (اے پی پی) وزیراعظم محمد شہباز شریف تیانجن یونیورسٹی اچ نیشنل ارتھ کوئیک سمولیشن سینٹر دا دورہ کیتا اتے چین دے قدرتی آفتاں نال نبڑݨ کیتے نویں ٹیکنالوجی دے استعمال دی تعریف کیتی ۔وزیراعظم دفتر دے میڈیا ونگ توں جاری بیان موجب نیشنل ارتھ کوئیک سیمولیشن سینٹر اچ وزیراعظم کوں ڈیزاسٹر مینجمنٹ اتے ریسکیو ٹیکنالوجیز بشمول نویاں تیار کیتیاں ڳئیاں میڈیکل ریسکیو ڳاݙیاں بارے بریفنگ ݙتی ڳئی۔ وزیراعظم کوں قدرتی آفتاں کیتے احتیاطی تدابیر کیتے تیار کیتی ڳئی نویں ٹیکنالوجی دے حوالے نال بریفنگ ݙتی ڳئی۔ وزیراعظم کوں ݙسایا ڳیا جو چین اتے پاکستان دے تعاون نال ایں بارے کئی منصوبے موجود ہن اتے ٻہوں ساریں تے کم جاری اے۔ انہاں منصوبیں اچ بیلٹ اینڈ روڈ انیشیئیٹیو دے تحت بݨائی ڳئی چائنا پاکستان جوئنٹ لیب فار ڈیزاسٹر اینڈ ایمرجنسی میڈیسن، بین الاقوامی میڈیکل کوآپریشن سینٹر، چین پاکستان فرینڈشپ ہسپتال اتے ݙوجھے منصوبے شامل ہن۔ وزیراعظم آکھیا جو چین اچ استعمال تھیوݨ آلی نویں ٹیکنالوجی اتے طریقے پاکستان اچ قدرتی آفتاں نال نبڑݨ کیتے ٻہوں مفید ثابت تھیسن۔ چینی مہارت توں فیدہ چاوݨ نال پاکستان اچ مستقبل اچ قدرتی آفتاں نال نبڑݨ کیتے موثر احتیاطی تدابیر اتے لائحہ عمل استعمال کیتے ونڄ سڳسن۔ وزیراعظم آکھیا جو قدرتی آفتاں نال نبڑݨ کیتے پاکستان اچ موجود بین الاقوامی میڈیکل سینٹر اتے چین پاکستان جوائنٹ لیب جیھے منصوبیں کوں مزید فعال بݨایا ونڄے اتے ایں بارے چین اتے پاکستان وچال سانجھے داری کوں مزید ودھایا ونڄے۔ وزیراعظم آکھیا جو پاکستان اچ اڄوکی چھل دی صورتحال نال نبڑݨ کیتے قومی سطح تے بھرپور کوششاں جاری ہن، نارووال، سیالکوٹ، وزیر آباد، حافظ آباد، چنیوٹ اتے جھنگ اچ اڄوکی چھل دی صورتحال توں متاثرہ خانداناں کیتے اج اضافی امدادی سامان دے قافلے وفاقی حکومت دی طرفوں بھیجے ڳئن جیڑھے صوبائی ڈیزاسٹر مینجمنٹ اتھارٹی دے حوالے کیتے ویسن۔ وزیراعظم این ڈی ایم اے کوں ملک اچ اڄوکی چھل دی صورتحال پاروں پنجاب حکومت دے نال مکمل رابطے اچ رہݨ اتے صوبائی ڈیزاسٹر مینجمنٹ اتھارٹیاں کوں بھرپور تعاون کرݨ دی تاکید کیتی۔ انہاں آکھیا جو چھل توں متاثرہ خانداناں کیتے امدادی کاروائیاں جاری رہسن۔
