تیانجن ۔31اگست (اے پی پی) وزیراعظم محمد شہباز شریف آکھیے جو پاک چین دوستی آپت دے اعتماد، احترام اتے سچی محبت دی بنیاد تے قائم اے، چین دے نال مضبوط دوستی تے ماݨ اے، پاکستان اتے چین ہر اوکھ اچ ہک ݙوجھے دا ساتھ ݙتے، غربت مکاوݨ اتے سانجھی خوشحالی دا صدر شی جن پنگ دا ویژن اساݙے کیتے رستہ ݙساوݨ آلی مشعل اے، بدعنوانی اتے غربت مکاوݨ اساݙی حکومت دی ترجیح اے، اساں کوں آپݨے نینگراں دیاں صلاحیتاں توں فیدہ چاوݨا اے، پاک چین دوستی دی مشعل ہݨ نینگراں دے ہتھ وچ اے، آو رَل تے ترقی اتے خوشحالی دا ہک نواں باب لِکھوں۔ انہاں اے ڳالھ تیانجن یونیورسٹی اچ فیکلٹی ممبران اتے طالب علماں نال خطاب کریندیں آکھی ۔ ایں موقع تے نائب وزیراعظم و وزیر خارجہ اسحاق ڈار، وفاقی وزیر منصوبہ بندی و ترقی احسن اقبال، وفاقی وزیر اطلاعات و نشریات عطا اللہ تارڑ، وزیراعظم دے معاون خصوصی طارق فاطمی اتے انہاں دے وفد دے ݙوجھے ارکان وی موجود ہن۔ وزیراعظم آکھیا جو تیانجن یونیورسٹی اچ موجودگی میں کیتے ماݨ دا باعث اے، پہلی واری 2017 اچ، میں ایں یونیورسٹی دا دورہ کیتا ہئی اتے پاکستانی اتے چینی طالب علماں نال ملاقات کیتی ہئی، تیانجن یونیورسٹی علم و عقل دی بہترین درسگاہ اے، یونیورسٹی بہترین سائنسدان اتے مفکر تیار کیتن۔ یونیورسٹی توں پڑھائی پوری کرݨ آلے طلباء چین دی ترقی دے سفر اچ بھرپور کردار ادا کیتے۔ میکوں پاکستان دے طالب علماں دی وݙی تعداد ݙیکھ تے خوشی تھئی اے، 200 توں ودھ پاکستانی طالب علم تیانجن یونیورسٹی اچ پڑھدے پئن، میݙا تہاݙے کیتے پیغام اے جو اللہ تعالیٰ تساکوں موقع ݙتے، ایں عظیم درسگاہ توں نویں تعلیم نال بھرپور تھیوو، پاکستان دا عظیم سفیر ہووݨ دے ناطے محنت نال تعلیم حاصل کرو، ویلھے دی پابندی کرو، اساں کوں تہاݙے توں وݙیاں امیداں ہن جو تساں پاکستان دی ترقی اچ بھرپور کردار ادا کریسو، پاکستان اتے چین دی دوستی کوں ودھیسو جیں دوستی دی بنیاد اساݙیاں پہلے آلیاں نسلاں رکھی ہئی۔ انہاں آکھیا جو پاک چین دوستی آپت دے اعتماد، احترام اتے سچی محبت دی بنیاد تے قائم اے، اساݙی دوستی ہر آزمائش تے پوری لتھی اے، پاکستان اتے چین ہر اوکھے ویلھے ہک ݙوجھے دا ساتھ ݙتے۔ انہاں آکھیا جو ٻہوں ساریاں تبدیلیاں وی آندیاں رہین لیکن اساݙی دوستی تکڑی توں ٻئی تکڑی تھئی اے، اساݙی منزل ہک اے، پاک چین دوستی اتے تعلقات اتنے ہی پراݨے ہن جِتنی جو شاہراہِ ریشم اے، پاکستان اتے چین تاریخی اتے ثقافتی اعتبار نال ہک ݙوجھے نال جڑے ہوئن۔ اے اساݙا صاف ویژن اے جو پاکستان اتے چین دی دوستی ہمیشہ ہمیشہ کیتے قائم رہسی، شاہراہ قراقرم ݙوہیں ملکاں وچال دوستی دا عظیم منصوبہ اے، پاکستان مسلم دنیا دا پہلا ملک ہئی جیں عوامی جمہوریہ چین کوں منیا، 60 سال پہلے بیجنگ ونڄݨ آلی پہلی بین الاقوامی پرواز کراچی توں روانہ تھئی۔ وزیراعظم آکھیا جو عظیم شاعر مشرق علامہ محمد اقبال چینی قوم دی اہلیت اتے صلاحیتاں کوں ڄاݨدے ہن، شاعر مشرق ہک صدی پہلے چین دی ترقی دی پیش گوئی کیتی ہئی، چین ایں ویلھے دنیا دی ساریں توں وݙیاں معیشتاں اچ شامل اے اتے اساں کوں بطور پاکستانی ایں تے ماݨ اے، چین 80 کروڑ توں ودھ لوکاں کوں غربت دی لکیر توں کڈھیے، اے ہک ٻہوں وݙی کامیابی اتے دنیا کیتے ہک ماڈل اے، چین اڄ دنیا دی ہک وݙی معاشی و فوجی طاقت اے، اساں کوں چین دے نال آپݨی مضبوط دوستی تے ماݨ اے، چین دے ویژنری اڳواݨ صدر شی جن پنگ دے سانجھی خوشحالی دے ویژن دنیا کوں آپݨے توں متاثر کر ڳھدے۔ پاکستان صدر شی جن پنگ دے ویژن اتے فلسفے دی مکمل حمایت کریندے۔ عوام دی بہبود چین دی حکومت دی ترجیح اے۔ انہاں آکھیا جو صدر شی جن پنگ سانجھی خوشحالی، ترقی دے ودھارے اتے بدعنوانی دے مکاوݨ تے یقین رکھیندن ایہا میݙی پاکستان اچ پالیسی اے، میݙی حکومت دے خلاف ہک پیسے دی کرپشن دا الزام وی کائنی ، شفافیت اتے اݨ تھک محنت قوماں دی قسمت بدل سڳدی اے، غربت مکاوݨ اتے سانجھی خوشحالی دا صدر شی جن پنگ دا ویژن اساݙے کیتے رستہ ݙساوݨ آلی مشعل اے، چین جے اڄ دنیا دی وݙی معاشی اتے فوجی طاقت اے تاں اے صرف گالھیں نال نی بلکہ عملی طریقے نال ممکن تھئے، صنعتی، زرعی، سائنس و ٹیکنالوجی اتے ݙوجھے شعبیں اچ ترقی کیتے پاکستان چین دی پیروی کریندا پئے۔ پاکستان اتے چین دی دوستی ہمالیہ توں اُچی اے۔ انہاں آکھیا جو پاکستان دی 60 فیصد آبادی نینگراں تے مشتمل اے، اساں کوں چین دے ماڈل توں سِکھݨ دی لوڑھ اے۔ انہاں آکھیا جو 30 ہزار دے نیڑے پاکستانی چین اچ پڑھدے پئن، اساں کوں نینگراں دیاں صلاحیتاں توں فیدہ چاوݨا اے، اے طلباء نویں تحقیق، نویں تعلیم اتے فنی صلاحیتاں توں فیدہ چیندے پئن، فنی تربیت اڄ دے دور دی لوڑھ اے، اساں چین دے تعاون نال فنی و پیشہ ورانہ تربیت دا ودھارا چاہندوں تعلیم دے میدان اچ پاکستانی اتے چینی یونیورسٹیاں دے تعاون دے مثبت نتیجے سامݨے آندے پئن، اساں آپݨے طلباء تے جو کجھ خرچ کریسوں اے اساݙی سرمایہ کاری ہوسی جیں دے فیدے مستقبل اچ اساں کوں ملسن ۔ وزیراعظم آکھیا جو اساں ہزاراں طالب علماں کوں چین اچ تعلیم و تربیت کیتے بھیڄیندے پیوں، 600 پاکستانی زرعی گریجویٹس چین توں آپݨی تربیت مکمل کر ڳھدی اے، ہواوے کتاب توں وی پاکستانی نینگراں کوں آئی ٹی دے شعبے اچ ہنرمند بݨاوݨ دے پروگرام جاری ہن، اساں مزید چینی کمپنیاں دے نال وی آئی ٹی، اے آئی اتے ݙوجھے پروگرام حاصل کرݨ چاہندوں ، پاک چین دوستی دی مشعل ہݨ نینگراں دے ہتھ اچ اے، آؤ رَل تے ترقی اتے خوشحالی دے دور دا ہک نواں باب لِکھوں۔ ایں توں پہلے وزیراعظم آپݨے خطاب دا آغاز قرآن پاک دیاں آیتاں دی تلاوت نال کیتا۔ وزیراعظم یونیورسٹی اچ پڑھدے پئے پاکستانی طلباء نال ملاقات کیتی، وزیراعظم کوں یونیورسٹی بارے بریفنگ وی ݙتی ڳئی۔ وزیراعظم کوں ݙسایا ڳیا جو تیانجن یونیورسٹی دا شمار چین دیاں پراݨیاں درس گاہواں اچ تھیندے، یونیورسٹی اچ انجینئرنگ، سائنس، مینجمنٹ، قانون، آرٹس اتے طب دی اُچی تعلیم ݙتی ویندی پئی اے، تیانجن یونیورسٹی دا چین دی صنعتی ترقی اچ اہم کردار اے، پاکستان اتے چین دے طلباء وچال یونیورسٹی پُل دا کردار ادا کریندی پئی اے۔
