چنیوٹ۔31 اگست (اے پی پی) وفاقی وزیر سرمایہ کاری بورڈ قیصر احمد شیخ چھل متاثرہ علاقیں دا دورہ کیتا، متاثرین کوں زیادہ توں زیادہ ریلیف ݙیوݨ دا اعلان کیتا۔ وفاقی وزیر سرمایہ کاری بورڈ قیصر احمد شیخ آکھیے جو چھل توں متاثرہ عوام کوں زیادہ توں زیادہ ریلیف ݙتا ویسی ، وفاقی و صوبائی حکومتاں مسلسل رابطے اچ ہن، قدرتی آفتاں توں تھیوݨ آلے ضیان دے ازالے کیتے ہر ممکن اقدامات کیتے ویندے پئن۔او چنیوٹ دے چھل متاثرہ علاقیں دے دورے دے دوران میڈیا نال ڳالھ مہاڑ کریندے پئے ہن۔ انہاں آکھیا جو زیادہ تر متاثرہ لوک آپݨے رشتے داراں یا ڄاݨو لوکاں کنے رہندے پئن، پر انہاں دی واپسی دے بعد انتظامیہ دے نال رَل تے مکمل بحالی دا عمل شروع کیتا ویسی۔ قیصر احمد شیخ آکھیا جو بھانویں فصلاں کوں نقصان ہک قدرتی آفت اے پر آوݨ آلے سیزن اچ ایں دا ازالہ کیتا ویسی اتے کاشتکاراں کوں زیادہ سہولتاں ݙتیاں ویسن۔ انہاں آکھیا جو وفاقی حکومت دی سطح تے امدادی پیکج تے غور جاری اے، صورتحال دا تفصیلی تجزیہ کر تے کابینہ اچ ڈسکس کیتا ویسی تاں جو زیادہ توں زیادہ متاثرین تئیں ریلیف پُجایا ونڄ سڳے۔وفاقی وزیر آکھیا جو ایں واری انتظامیہ دیاں وقتی کاروائیاں اتے وفاقی و صوبائی حکومتاں دی کوآرڈینیشن دی وجہ توں وݙے جانی ضیان توں بچݨ ممکن تھئے ۔ ہک سوال دے جواب اچ انہاں آکھیا جو وزیراعظم آپݨی تقریر اچ وی ڈیماں دی تعمیر تے زور ݙتے۔ اساں کنے کافی پاݨی موجود اے، جے ایں کوں محفوظ نہ کیتا ونڄے تاں اے ضائع تھی تے نقصان دا باعث بݨدے۔ لوڑھ ایں امر دی اے جو چنیوٹ سودھے ݙوجھے علاقیں تے ڈیماں اتے ذخائر دی تعمیر دے حوالے نال سنجیدگی نال اڳوں ودھیا ونڄے تاں جو مستقبل اچ آفتاں دے اثرات کوں گھٹ توں گھٹ کیتا ونڄ سڳے۔
