ملتان۔ 31 اگست (اے پی پی) چیئرمین سینیٹ سید یوسف رضا گیلانی آکھیے جو پاکستان ایں ویلھے اوکھی چھل دی صورتحال نال ݙوچار اے، ݙکھے ویلھے متاثرین دا بھرپور ساتھ ݙیسوں۔ اے ڳالھ انہاں سرکٹ ہاؤس ملتان اچ پاکستان فیڈرل یونین آف جرنلسٹ دے سینئر عہدیداراں نال ملاقات اچ آکھی ۔ سجادہ نشین درگاہ موسیٰ پاک شہید سید ابوالحسن گیلانی، سید مجتبیٰ گیلانی اتے صدر انجمن اسلامیہ سید عمران حسن گیلانی وی ملاقات اچ موجود ہن۔ ملتان اچ انجمن اسلامیہ دی فلاحی کوشش دا ذکر کریندیں انہاں آکھیا جو انجمن اسلامیہ دی ملتان اتے جنوبی پنجاب دے لوکاں کیتے فلاحی اتے علمی حوالے نال خدمات کوں بھلایا نی ونڄ سڳدا۔ ایں حوالے نال اتھاں بہترین پلیٹ فارم ݙتے ڳئن۔ عید میلادالنبی صلی اللہ علیہ وآلہ وسلم دے موقع تے ہر سال جیڑھے انتظامات کیتے ویندن او لوکاں دی ترجمانی کریندن۔ چیئرمین سینٹ مزید آکھیا جو گیلانی لاء کالج تعلیمی اعتبار توں ہک بہترین درسگاہ اے۔ ایں درسگاہ دے 10 پی ایچ ڈی سکالر ایں ویلھے موجود ہن جیڑھا ہک اعزاز اے۔ سید یوسف رضا گیلانی اڄوکی پاک بھارت جنگ اچ پاکستانی میڈیا دے کردار دی تعریف کیتی اتے آکھیا جو صحافیاں قومی یکجہتی کیتے ہمیشہ ہک مثبت کردار ادا کیتا جیڑھا قابل تعریف اے۔ ایں توں پہلے پی ایف یو جے دے صدر رانا عظیم پورے ملک توں آئے سینئر عہدیداراں، دے نال چیئرمین سینٹ نال ملاقات کیتی اتے پیکا ایکٹ دے حوالے نال آپݨے تحفظات دا اظہار کیتا۔ چھیکڑ اچ پورے پاکستان دے چھل متاثرین اتے سید تنویر حسن گیلانی دی روح دے ایصال ثواب کیتے دعا کرائی ڳئی۔
