تیانجن۔31اگست (اے پی پی) وزیراعظم محمد شہباز شریف اتے ترکیہ دے صدررجب طیب ایردوان ݙو طرفہ تعلقات تے اطمینان دا اظہار کریندیں امن، استحکام اتے خوشحالی کیتے تعاون کوں مزید تکڑا بݨاوݨ دا عزم کیتے۔ وزیراعظم دفتر دے میڈیا ونگ توں جاری بیان موجب وزیراعظم محمد شہباز شریف چین دے شہر تیانجن اچ ایس سی او کونسل آف ہیڈز آف اسٹیٹ دے موقع تے ترکیہ دے صدر رجب طیب ایردوان نال ملاقات کیتی۔ ݙوہیں اڳواݨاں پاک-ترک تعلقات دی موجودہ صورتحال دا جائزہ ڳھندیں ݙو طرفہ تعلقات دی ودھدی رفتار تے اطمینان دا اظہار کیتا۔ انہاں سیاسی، اقتصادی، دفاعی اتے سلامتی دے شعبیں سودھے وسیع میدان اچ اُچے درجے دے تبادلیں اتے تعاون اچ مسلسل ودھارے کوں چنڳاں آکھیے۔ ترکیہ دے صدر پاکستان اچ اڄوکے ساوݨ مینھ پاروں چھل دی صورت حال دے نتیجے اچ تھیوݨ آلے قیمتی جاناں دے ضیان اتے مالی ضیان تے پاکستان دے عوام دے نال یکجہتی دا اظہار کریندے آکھیےاوکھے ویلھے اچ ترکیہ دی حکومت اتے عوام پاکستان دے نال ہن۔ ݙوہیں اڳواݨاں اہم علاقائی اتے بین الاقوامی پیش رفت تے وی ڳالھ مہاڑ کیتی۔ انہاں غزہ اچ وڳڑدی انسانی صورتحال تے تشویش دا اظہار کریندیں فلسطینی عوام دے جائز حقوق دی حمایت اتے جاری اسرائیلی جارحیت اتے نسل کشی دیاں پالیسیاں دی مذمت کیتے بین الاقوامی پلیٹ فارم استعمال کرݨ کیتے آپݨے سانجھے عزم دا اعادہ کیتا۔ ملاقات اچ پاکستان اتے ترکیہ وچال گھاٹے بھرپی دے تعلقات بݨاوݨ اتے مسلم دنیا اتے ایں توں ٻاہر امن، استحکام اتے خوشحالی کیتے آپت دا تعاون مزید تکڑا بݨاوݨ دے سانجھے عزم دا وی اظہار کیتا ڳئے۔
