ملتان۔ 01 ستمبر (اے پی پی) کمشنر ملتان ڈویژن عامر کریم خان آکھیا جو سیلابی صورتحال دی وجہ توں وݙے پیمانے تے انخلا دا عمل مکمل کیتا ویندا پئے، ہݨ تئیں 4 لکھ 50 ہزار 267 توں ودھ لوکاں کوں محفوظ علاقیاں اچ منتقل کیتا ڳئے۔ 4 لکھ 68 ہزار 284 مال مویشی وی انتظامیہ دی نگرانی اچ محفوظ علاقیاں تئیں پڄا ݙتے ڳئن۔ انہاں سیلاب متاثرین بارے تفصیل ݙسیندیں ہوئیں آکھیا جو فلڈ ریلیف کیمپاں دی تعداد 84 توں ودھا تے 88 کر ݙتی ڳئی اے تاں جو متاثرہ لوکاں کوں سہولت فراہم کیتی ون٘ڄ سڳے۔ انہاں آکھیا جو دریائے چناب اچ 8 لکھ کیوسک دا ریلہ سنوار اتے منگل دی وچلی رات کوں لنگھݨ دا امکان اے۔ شیرشاہ اتے ہیڈ محمد والا اچ بریچنگ دا فیصلہ پاݨی دی صورتحال ݙیکھ تے کیتا ویسی۔ انہاں دے مطابق گھٹ علاقیاں اچ متاثرہ لوکاں کوں انتظامیہ آپ منتقل کریندی پئی اے، زیادہ تر متاثرہ خاندان آپݨے عزیزاں اتے رشتے داراں دے کول رہݨ کوں ترجیح ݙیندن۔ فلڈ کیمپاں اچ رہݨ آلے لوکاں دی تعداد صورتحال دے مطابق بدلدی رہندی اے۔ کمشنر آکھیا جو متاثرین کوں رہݨ، کھاوݨ اتے پاݨی پیوݨ دی سہولت فراہم کیتی ڳئی اے۔ مال مویشیاں کیتے چارہ اتے متاثرین کیتے ویکسی نیشن دی سہولت وی موجود اے۔ انتظامیہ مزاحمت کرݨ آلیاں کوں زبردستی محفوظ علاقیاں اچ منتقل کریندی پئی اے۔
