اسلام آباد۔1ستمبر (اے پی پی) صدر مملکت آصف علی زرداری کل جماعتی حریت کانفرنس دے بانی اڳواݨ سید علی گیلانی کوں خراج عقیدت پیش کریندیں ہوئیں آکھیا جو انہاں پوری زندگی حق خود ارادیت دی جدوجہد کیتے وقف کیتی، انہاں دی زندگی قربانی اتے ثابت قدمی دی علامت اے۔ سنوار کوں ایوان صدر دے پریس ونگ ولوں جاری بیان دے مطابق سید علی شاہ گیلانی دی چوتھی برسی تے آپݨے سنیھے اچ صدر مملکت آکھیا جو سید علی گیلانی دی زندگی قربانی اتے ثابت قدمی دی علامت اے، انہاں دی ذات حق و انصاف تے یقین رکھݨ آلیاں کیتے رستہ ݙساوݨ آلی مشعل اے۔ انہاں آکھیا جو بھارتی ظلم و ستم سید علی گیلانی دے عزم اتے جرات کوں ہِلا نہ سڳیا، انہاں دے موقف کشمیری عوام کوں آزادی دی جدوجہد تے ثابت قدم رکھیا، پاکستان سید علی گیلانی اتے کشمیری عوام دی قربانیاں کوں خراجِ تحسین پیش کریندے۔ صدر مملکت آکھیا جو سید علی گیلانی دا لہو تحریکِ آزادی کوں ہمیشہ زندہ رکھیسی اتے پاکستان کشمیری عوام دا مقدمہ ہر فورم تے چیندا رہسی، بھارتی جبر کشمیری عوام دے حوصلے گھٹ نئیں کر سڳدا۔ آصف علی زرداری آکھیا جو کشمیری عوام کوں اقوامِ متحدہ دی قرارداداں دے مطابق حق خود ارادیت مِلݨا چاہیدے۔ انہاں دعا کیتی جو اللہ تعالیٰ سید علی گیلانی دے درجے اُچے فرماوے۔
