اسلام آباد۔1ستمبر (اے پی پی) وزیراعظم محمد شہباز شریف جنوبی ایشیا اچ پائیدار امن کیتے جامع گالھ مہاڑ دی لوڑھ تے زور ݙیندیں ہوئیں آکھیا جو پاکستان آپݨے سارے پڑوسی ملکاں نال معمول دے تعلقات رکھݨ دا خواہشمند اے، امن، ترقی اتے خوشحالی کیتے ایس سی او رُکن ملکاں دے نال رَل تے کوششاں جاری رکھیسوں، ایران تے اسرائیل دی بے جواز جارحیت قابل مذمت اتے نہ منݨ جوھڳی اے، غزہ اچ جاری ظلم اتے بُکھ اساݙے سانجھے ضمیر تے نہ مکݨ آلا زخم اے، ظلم تے خونریزی دے فوراً خاتمے دے مطالبے دا اعادہ کریندن، پاکستان شدید بارشاں، گلوبل وارمنگ، کلائوڈ برسٹ اتے تباہ کُن سیلاب دی ولھیٹ اچ اے، عالمی برادری خاص کر چین ولوں تعاون کوں قدر دی نگاہ نال ݙیکھدوں۔ انہاں اے ڳالھیں سنوار کوں چین دے شہر تیانجن اچ منعقدہ 25ویں ایس سی او سربراہان مملکت کونسل دے اجلاس نال خطاب کریندیں ہوئیں کیتا۔ وزیراعظم تیانجن اچ موجودگی کوں آپݨے کیتے فخر دا باعث قرار ݙیندیں ہوئیں آکھیا جو تیانجن چین دی بنیادی قدراں دی نمائندگی کریندے اتے تہذیباں اتے ثقافتاں کیتے پُل دا کردار ادا کریندے، تیانجن اچ اساں ایں ہی جذبے دی تجدید کیتے ہک جاہ ہن۔ انہاں آکھیا جو شاندار میزبانی اتے بھرپور انتظامات تے چین دے صدر اتے حکومت دا شکریہ ادا کرینداں۔ انہاں ازبکستان اتے کرغزستان کوں انہاں دے یوم آزادی تے مبارکباد ݙتی۔ وزیراعظم آکھیا جو ایس سی او علاقائی تعاون تے انضمام دے ودھارے کیتے پاکستان دے پکے عزم دی عکاسی اے، چین دی کامیابی صدر شی جن پنگ دی مدبرانہ اتے بصیرت افروز اڳواݨی دا مظہر اے، چین دی عالمی اڳواݨی ایس سی او ای نئیں بلکہ کئی علاقائی اتے بین الاقوامی فورمز اتے نمایاں اقدامات اچ نظر آندی اے۔ انہاں آکھیا جو پاکستان ہمیشہ بہوں پاسہ گالھ مہاڑ اتے سفارت کاری دی طاقت تے یقین رکھیندے، کہیں وی ملک کیتے خودمختاری اتے علاقائی سالمیت توں ودھ تے کجھ نئیں، پاکستان ایس سی او رُکن اتے پڑوسی ملکاں دی خودمختاری تے علاقائی سالمیت دا احترام کریندے۔ وزیراعظم آکھیا جو اساں سارے بین الاقوامی اتے ݙو پاسہ معاہدیاں دا احترام کریندوں، معاہدیاں دے مطابق پاݨی تئیں بغیر رکاوٹ رسائی ایس سی او دے مقصداں کوں ٻیا مضبوط کریسی۔ انہاں سارے پڑوسی ملکاں نال معمول دے تعلقات دی پاکستان دی خواہش دا اعادہ کریندیں ہوئیں آکھیا جو معمول دے تعلقات کیتے گالھ مہاڑ اتے سفارت کاری دے خواہشمند ہیسے، امن، ترقی اتے خوشحالی کیتے ایس سی او رُکن ملکاں دے نال کوششاں جاری رکھیسوں۔ انہاں جنوبی ایشیا اچ پائیدار امن کیتے جامع گالھ مہاڑ دی لوڑھ تے زور ݙیندیں ہوئیں آکھیا جو پاکستان اقوام متحدہ اتے ایس سی او دے چارٹرز تے عمل کریندا رہیے اتے کریندا رہسی۔ وزیراعظم ایران تے اسرائیل دی بے جواز جارحیت کوں قابل مذمت اتے نہ منݨ جوھڳی قرار ݙیندیں ہوئیں آکھیا جو جامع گالھ مہاڑ نال سارے پراݨے مسلے حل کیتے ون٘ڄ سڳسن، غزہ اچ جاری ظلم اتے بُکھ اساݙے سانجھے ضمیر تے نہ مکݨ آلا زخم اے۔ انہاں آکھیا جو پاکستان اقوام متحدہ دے منظور کیتے ڳئے ݙو پاسہ ریاستی حل دی حمایت کریندے، غزہ اچ جاری ظلم تے بربریت اتے بُکھ اساݙے ضمیر تے بوجھ اے، ظلم تے خونریزی دے فوراً خاتمے دے مطالبے دا اعادہ کریندن۔ انہاں دہشت گردی، علیحدگی پسندی اتے انتہا پسندی کوں پورے خطے کیتے سنگین خطرہ قرار ݙیندیں ہوئیں آکھیا جو پاکستان دہشت گردی دی ہر شکل اتے ہر صورت دی مذمت کریندے، دنیا سیاسی فائدیاں کیتے دہشت گردی کوں ہتھیار دے طور تے استعمال کرݨ آلے ملکاں دے کوڑے بیان کوں نئیں منیندی۔ انہاں آکھیا جو بلوچستان تے خیبر پختونخوا اچ دہشت گرد حملیاں اچ ٻاہر دے ہتھ ملوث ہوݨ دے ثبوت موجود ہن، گھنّے جرم دے ذمہ واراں اتے انہاں دے سہولت کاراں کوں جواب ݙیوݨا پوسی۔ وزیراعظم آکھیا جو پاکستان دہشت گردی دے خلاف جنگ اچ بے حد قربانیاں ݙتن، پاکستان صرف آپݨے کیتے نئیں بلکہ پورے خطے اتے دنیا کیتے قربانی ݙتی، اساں 90 ہزار توں ودھ قیمتی جاناں قربان کیتیاں ہن، ماواں، ٻالاں، انجینئراں، ڈاکٹراں، سائنس داناں، شہریاں اتے افسراں آپݨی جاناں دا نذرانہ پیش کیتے۔ وزیراعظم افغانستان کوں بھائی چارے آلا پڑوسی ملک قرار ݙیندیں ہوئیں آکھیا جو مستحکم افغانستان نہ صرف اساݙے بلکہ پورے خطے دے فیدے اچ اے، اساں افغان اڳواݨی نال تعلقات کوں مضبوط کریندے پئیوں تاں جو چنڳے پڑوسی اتے معاشی شراکت دار دے طور تے افغانستان کوں نال ڳھن تے ٹر سڳوں، امید اے جو اے تعاون اتے ترائے پاسہ ملاقاتاں مستقبل اچ مثبت نتیجے ݙیسن۔ وزیراعظم خطے اچ رابطیاں دے ودھارے دی اہمیت کوں اجاگر کریندیں ہوئیں آکھیا جو سی پیک پاکستان اتے چین دے وچال ہک بہترین منصوبہ اے، چین پاکستان اقتصادی راہداری (سی پیک) ایں ویژن دی عملی مثال اے۔ انہاں آکھیا جو ایس سی او دے مقصداں، علاقائی رابطیاں اتے معاشی انضمام دی تکمیل اچ علاقائی رابطے مدد گار ثابت تھی سڳدن، مستحکم سپلائی چینز کیتے قابل بھروسہ زمینی، فضائی اتے ریلوے رستیاں دی لوڑھ اے۔ وزیراعظم اجلاس نال خطاب کریندیں ہوئیں شرکاء کوں پاکستان اچ شدید بارشاں، گلوبل وارمنگ، کلائوڈ برسٹ اتے تباہ کُن سیلاب دی صورتحال بارے ݙسایا۔ انہاں آکھیا جو سیلاباں قیمتی انسانی جاناں دا ضیاع کیتے، انفراسٹرکچر، املاک، فصلاں اتے مال مویشیاں کوں شدید نقصان پُجایا اے۔ انہاں آکھیا جو پاکستان عالمی برادری خاص کر چین ولوں سیلاب دی صورتحال اچ اظہار ہکو جہت اتے تعاون کوں قدر دی نگاہ نال ݙیکھدے، اساݙے بہادر اتے پکے لوک ریسکیو اتے بحالی دے کماں اچ مصروف ہن، اساں سیلاب دی تباہ کاریاں توں بچاؤ کیتے نویں امید دا راہ ٻݨیندے پئیوں۔ انہاں گزریل ݙیݙھ سال اچ پاکستان دی متاثر کُن معاشی بحالی دا ذکر کریندیں ہوئیں آکھیا جو اساݙا معاشی تبدیلی دا منصوبہ ترائے ستوناں تے مبنی اے، تجارت، انفراسٹرکچر، زراعت، آئی ٹی اتے معدنی وسیلیاں اچ نویں سرمایہ کاری معاشی تبدیلی دا پہلا ستون، تحقیق اتے نویں سوچ دی حوصلہ افزائی معاشی تبدیلی دا ݙوجھا ستون جݙاں جو جامع ٹیکس اصلاحات دے ذریعے محصولات اچ ودھارا معاشی تبدیلی دا تریجھا ستون اے۔ انہاں آکھیا جو اساں آپݨی نوجوان نسل کوں با اختیار ٻݨٰندے پئیوں، انہاں کوں بامقصد روزگار اتے مثبت موقع فراہم کریندے پئیوں، مہانگائی اچ گھٹکی، کرنٹ اکاؤنٹ سرپلس اتے سٹاک مارکیٹ اچ نمایاں بہتری آئی اے۔ وزیراعظم ایس سی او دے چارٹر دے نال نہ ہِلݨ آلے عزم دا اعادہ کریندیں ہوئیں آکھیا جو او “شنگھائی اسپرٹ” دی اُچیاں قدراں کوں برقرار رکھݨ کیتے آپݨے عہد دا اعادہ کریندن، اڳوں دا سفر لمبا اتے اوکھا ہوسی، کݙاہیں تیز دُھپ، کݙاہیں سخت ٹھنڈی ہوائیں اساݙے حوصلیاں، صبر اتے عزم دا امتحان ڳھنسن لیکن اساݙا مقصد اساں کوں ساری اوکھ کوں برداشت کرݨ دے قابل بݨیندے۔ وزیراعظم ایس سی او دے رُکن ملکاں دے ساݙھے ترائے ارب عوام کیتے امن، استحکام اتے خوشحالی کیتے کم کرݨ دے عزم دا اظہار کریندیں ہوئیں آکھیا جو اساں سارے رَل تے ایں پندھ کوں جاری رکھیسوں۔ وزیراعظم دہشت گردی دے خلاف جنگ اچ پاکستان دی قربانیاں دا ذکر کریندیں ہوئیں آکھیا جو ایں جنگ اچ اساں 152 ارب ڈالر توں ودھ دے معاشی نقصانات برداشت کیتے، پاکستان جِتنی قربانیاں دی مثال تاریخ اچ کہیں کائینی ملدی۔
