اسلام آباد۔1ستمبر (اے پی پی) صدر مملکت آصف علی زرداری افغانستان اچ زلزلے دے متاثرین نال دِلی تعزیت دا اظہار کیتے۔ سنوار کوں ایوان صدر دے پریس ونگ ولوں جاری بیان موجب صدر مملکت افغانستان اچ زلزلے دے نتیجے اچ فوت تھیوݨ آلے لوکاں دے گھر آلیاں نال ݙکھ دا اظہار کریندیں ہوئیں آکھیا جو اوکھ دی ایں گھڑی اچ پاکستان افغان عوام دے نال کھڑے۔ صدر آصف علی زرداری آکھیا جو زخمیاں دی جلدی صحتیابی اتے متاثرہ خانداناں دے حوصلے کیتے دعاگو ہاں، اللہ تعالیٰ فوت تھیوݨ آلے لوکاں کوں جنت اچ جاہ ݙیوے اتے لواحقین کوں صبر عطا فرماوے۔
