تیانجن۔1ستمبر(اے پی پی)وزیر اعظم محمد شہباز شریف نال کمیونسٹ پارٹی آف چائنہ تیانجن دے سٹینڈنگ ممبر اتے تیانجن-بنہائی نیو ایریا دے پارٹی سیکرٹری لیون مائو جن وفد نال ملین۔ وزیر اعظم آکھیا جو چین اتے پاکستان ہر اوکھ اچ ہک ڈوخھے دے نال کھڑے رہین، پاکستان دی اقتصادی اتے سماجی ترقی اچ چین ٻہوں اہم کردار ادا کیتے، چین-پاکستان اقتصادی راہداری پاکستان اچ توانائی دے شعبے دی ترقی اتے بنیادی ڈھانچے دی تعمیر کیتے ودھ کردار نٻھائے، چین-پاکستان اقتصادی راہداری دے فیز 2 اچ سمارٹ سٹیز، زرعی صنعت دے حوالے نال تعاون اتے نیکسٹ جنریشن ٹیکنالوجی انڈسٹری تے خاص توجہ ݙتی ویسی۔ بنہائی نیو ایریا اتے پاکستان وچال اقتصادی تعاون اتے تجارت ودھاوݨ چاہندے ہیں، پاکستان دے کراچی پورٹ، بن قاسم پورٹ اتے گوادر پورٹ اتے چین دے تیانجن پورٹ وچال تعاون اتے تجارت کوں ودھاوݨ چاہندن، پورٹ ہینڈلنگ اتے پورٹ آپریشنز دے معاملیاں دے حوالے نال تیانجن-بنہائی نیو ایریا دی مہارت توں فائدہ چاوݨ چاہندے ہیں۔ پاکستان اچ خصوصی اقتصادی زونز سانڳے چینی کمپنیاں کوں خوش آمدید آھدے ہیں، فارماسیوٹیکل، بائیو میڈیسن اتے جانوراں دی ویکسین دے حوالے نال تیانجن-بنہائی نیو ایریا دی صنعت نال تعاون دی لوڑھ اے۔ وزیراعظم محمد شہباز شریف تیانجن توں صنعتی اتے اقتصادی شعبے نال وابستہ نمایاں لوکاں دے وفد کوں پاکستان دا دورہ کرݨ دی دعوت ݙتی۔ ملاقات اچ وزیراعظم کوں تیانجن-بنہائی نیو ایریا دے پارٹی سیکرٹری لیون مائو جن ولوں تیانجن-بنہائی نیو ایریا دے حوالے نال بریفنگ ݙتی ڳئی۔ ملاقات اچ نائب وزیر اعظم و وزیر خارجہ اسحاق ڈار، وفاقی وزیر منصوبہ بندی احسن اقبال، وفاقی وزیر اطلاعات و نشریات عطاء اللہ تارڑ، وزیر اعظم دے معاون خصوصی طارق فاطمی، پاکستان اچ تعینات چین دے سفیر جیانگ زیڈونگ، چین اچ تعینات پاکستان دے سفیر خلیل ہاشمی اتے متعلقہ اعلیٰ سرکاری افسر وی موجود ہن۔
