ملتان۔ 01 ستمبر(اے پی پی)چیئرمین سینٹ سید یوسف رضا گیلانی سنوار کوں ملتان دے سیلاب زدہ علاقیاں قاسم بیلہ بستی لنگڑیال اتے مظفر آباد دی نیڑے دیاں وستیاں دا دورہ کیتا اتے فلڈ ریلیف کیمپاں اچ دوائیں دی دستیابی اتے ٻیاں سہولتاں دا جائزہ ڳھدا۔ ممبر قومی اسمبلی سید علی قاسم گیلانی، سید احمد مجتبیٰ گیلانی، سیاسی رہنما ملک منظور ڈومرہ، سیاسی اتے سماجی رہنماواں سمیت ڈپٹی کمشنر ملتان وسیم حامد سندھو، سی پی او ملتان صادق علی ڈوگر اتے ضلعی انتظامیہ دے ٻئے افسر وی انہاں دے نال ہن۔ سید یوسف رضا گیلانی قاسم بیلہ اتے وستی لنگڑیال اچ بݨائیاں ڳئاں خیمہ وستیاں اچ سیلاب متاثرین نال ملین۔ انہاں دی خیر اتے مسئلیں کوں پچھیا۔ ایں توں بعد میڈیا نال گالھ مہاڑ کریندے ہوئیں چیئرمین سینٹ سید یوسف رضا گیلانی آکھیا جو پاکستان اتے خاص کر پنجاب اچ سیلاب نال ٻہوں لوک متاثر تھئن، اپݨیں گھراں کوں چھوڑݨ سوکھا نئیں ہوندا ٻھل زندگی بچاوݨ کیتے اے ضروری اے جو سیلاب زدہ علاقے کوں وقتی طور تے چھوڑ ݙتا ونڄے تاں جو انسانی جاناں کوں بچایا ونڄ سڳے۔ قومی یکجہتی کیتے ضروری اے جو مصیبت دے ایں ویلھے اچ سیلاب متاثرین دا اجتماعی طور تے ساتھ ݙتا ونڄے۔ انہاں سیلاب بارے لوکاں دی رہنمائی اتے انہاں کوں آگاہی ݙیوݨ تے میڈیا دے کردار دی تعریف کیتی۔(ج، م/ 18:45)
