وزیراعظم شہباز شریف دا چینی صدر دے گلوبل گورننس انیشیٹو دے اجراء دے تاریخی اعلان دا خیرمقدم

تیانجن۔1ستمبر(اے پی پی)وزیراعظم محمد شہباز شریف چین دے صدر شی جن پنگ دے گلوبل گورننس انیشیٹو (جی جی آئی) دے اجراء دے تاریخی اعلان دا خیرمقدم کریندے ایکوں ہک مضبوط نظام کیتے ہک تاریخی قدم قرار ݙتے اتے آکھیے جو اے اقدام عالمی گورننس سسٹم کوں ترقی پزیر ملکاں دیاں لوڑھاں دے مطابق ڈھالݨ اتے کرہ ارض کوں درپیش جدید چیلنجاں نال نبڑݨ اچ مددگار ثابت تھیسی، تیانجن اعلامیہ نال خطے اچ امن اتے خوشحالی دے سانجھے مقصد کوں ودھارا ملسی۔ چین دے شہر تیانجن اچ ایس سی او (پلس) نال خطاب کریندے وزیراعظم محمد شہباز شریف چین دے صدر شی جن پنگ ولوں جی جی آئی دے اجراء دے تاریخی اعلان کوں سراہیا۔ وزیراعظم جی جی آئی دی حمایت کیتے پاکستان دا عزم دوہریندے آکھیا جو اے ہک مضبوط کثیت الجہتی نظام کیتے اہم اتے تاریخی قدم اے اتے اقوام متحدہ دے چارٹر دے نال وی میل کھاندے، پاکستان ایں اقدام اچ فعال حصہ گھنݨ کیتے ودھ دلچسپی رکھدے۔ وزیراعظم شنگھائی تعاون تنظیم دے سربراہی اجلاس دی کامیابی تے چینی صدر شی جن پنگ کوں مبارکباد ݙتی۔ انہاں تیانجن اعلامیہ دی تعریف کریندے آکھیا جو او پر امید ہین جو ایںدے نال خطے اچ امن اتے خوشحالی دے سانجھے مقصد کوں ودھارا ملسی۔ وزیراعظم آکھیا جو امن، ترقی اتے رابطیاں دے ودھارے نال ایس سی او دے چارٹر اتے “شنگھائی سپرٹ” اچ درج سُنہری اصولاں کوں برقرار رکھݨ کیتے پاکستان پر عزم اے۔ انہاں آکھیا جو موجودہ موسمیاتی بحران اچ سانجھی ذمہ واری ودھ اہمیت اختیار کر ڳئی اے، پاکستان ڄھیں ترقی پزیر ملکاں کوں مسلسل موسمیاتی تبدیلیاں توں پیدا تھیوݨ آلیاں آفتاں دا سامݨا اے، اے منی ہوئی حقیقت اے جو ماحول دشمن گیساں دے عالمی اخراج اچ پاکستان اتے ایں ڄھئیں ٻئے ترقی پزیر ملکاں دا حصہ صرف ہک فیصد توں وی گھٹ اے، عالمی اڳواݨی کوں ترقی پزیر ملکاں دا ٻھار ونڈاوݨ دی لوڑھ اے تاں جو ٻیاں قیمتی جاناں اتے معاشی نقصاناں توں بچیا ونڄ سڳے۔ وزیراعظم آکھیا جو پاکستان تنازعیاں اتے مذاکرات اتے سارے مسلیاں کوں پر امن طریقے نال حل کرݨ کوں ترجیح ݙیندے، پاکستان غزہ دے بے گناہ فلسطینیاں دے خلاف اسرائیل دے گھناؤے جرماں دی مذمت کریندا اتے اقوام متحدہ دی سلامتی کونسل دیاں قرارداداں دے مطابق مسئلہ فلسطین دے حل دے نال نال خطے اچ فوری جنگ بندی چاہندے۔ وزیراعظم لائوس پیپلز ڈیموکریٹک ریپبلک دی ہک ڈائیلاگ پارٹنر دے طور تے ایس سی او فیملی اچ شمولیت دا خیرمقدم کیتا۔ ایس سی او (پلس) اجلاس اچ مستقل رُکناں دے سربراہان مملکت دے نال نال ڈائیلاگ پارٹنرز اتے مبصر ملکاں، عالمی تنظیماں دے سربراہان و نمائندے وی شریک ہن