اسلام آباد۔1ستمبر(اے پی پی)وزیراعظم محمد شہباز شریف شنگھائی تعاون تنظیم اچ پاکستان دے قابل اعتماد شراکت دار دے طور تے کردار دی یقین دہانی کریند ے رُکن ملکاں تے زور ݙتے جو ڳالھ مہاڑ، آپسی احترام اتے سفارتکاری کوں برقرار رکھیندے ہوئیں تنازعاں کوں پرامن طریقے نال حل کیتا ونڄے۔ دفتر خارجہ موجب شنگھائی تعاون تنظیم دے سی ایچ ایس پلس اجلاس ویلھے کثیر الجہتی تعاون کوں حقیقت منݨ اتے علاقائی سلامتی و پائیدار ترقی کوں ودھاوݨ دے موضوع تے خطاب کریندے ہوئیں وزیراعظم محمد شہباز شریف کثیر الجہتی نظام، اقوام متحدہ دے مقصداں اتے اصولاں دا احترام کرݨ اتے تنازعاں کوں پرامن طریقے نال حل کرݨ دی لوڑھ تے زور ݙتے اتے آپسی احترام اتے جامع سفارتکاری کوں برقرار رکھݨ دی وی صلاح ݙتی۔ انہاں آکھیا جو ایس سی او کوں نویں سوچ تے مبنی ترقی کوں آپݨی ترجیح بݨاوݨا چاہیدے۔ انہاں شنگھائی تعاون تنظیم دے ترقی اچ تعاون دے عزم دا خیرمقدم کریندے انہان آکھیا جو پاکستان ہک قابل اعتماد شراکت دار دے طور تے آپݨا کردار ادا کریسی۔ دفتر خارجہ دے بیان دے مطابق وزیراعظم محمد شہباز شریف 31 اگست توں ہک ستمبر 2025 چین دے شہر تیانجن اچ چین دے صدر شی جن پنگ دی زیر صدارت شنگھائی تعاون تنظیم دے سربراہان مملکت دے اجلاساں “سی ایچ ایس” اتے “سی ایچ ایس پلس” اچ پاکستانی وفد دی اڳواݨی کیتی۔ شنگھائی تعاون تنظیم دے سربراہ اجلاس نال آپݨے خطاب اچ وزیراعظم شہباز شریف “شنگھائی سپرٹ” کیتے پاکستان دا عزم دوہرایا ڄیڑھا سانجھی خوشحالی اتے ترقی کیتے آپسی اعتماد اتے احترام آلا اے۔ اقوام متحدہ اتے شنگھائی تعاون تنظیم دے چارٹر دے مقصداں اتے اصولاں دا اعادہ کریندیں وزیراعظم آکھیا جو پاکستان شنگھائی تعاون تنظیم دے سارے رُکناں دی خودمختاری اتے علاقائی سالمیت دے نال نال سارے بین الاقوامی اتے ݙو پاسہ معاہدیاں دا احترام کریندے۔ انہاں امید کیتی جو شنگھائی تعاون تنظیم دے سارے رُکن ملک انہاں اصولاں تے عمل کریسن، انہاں شنگھائی تعاون تنظیم دے رُکن ملکاں وچال موجودہ معاہدیاں دے مطابق پاݨی دے مناسب حصے تئیں بغیر رکاوٹ رسائی تے زور ݙتا۔ ہمسایاں نال تعلقات سانڳے انہاں آکھیا جو پاکستان آپݨے سارے پڑوسیاں نال معمول دے تعلقات رکھݨ چاہندے، آمنا سامنا دی بجائے مذاکرات اتے سفارتکاری کوں ترجیح ݙیندے۔ انہاں جنوبی ایشیا اچ پائیدار امن کیتے سارے پراݨے تنازعاں تے الاوݨ کیتے جامع اتے منظم گالھ مہاڑ تے زور ݙتا۔ وزیراعظم ریاستی دہشت گردی سودھا ہر قسم دی دہشت گردی دی مذمت کریندے آکھیا جو پاکستان علاقائی اتے عالمی استحکام کیتے دہشت گردی دا مقابلہ کرݨ کیتے وݙیاں قربانیاں ݙتین۔ انہاں آکھیا جو پاکستان کولو جعفر ایکسپریس ٹرین یرغمالیاں دے واقعے اتے بلوچستان اتے خیبر پختونخوا اچ ٻہوں سارے ݙوجھے دہشت گرد حملیاں اچ غیر ملکی ہتھ دے ملوث ہوݨ دے نہ مکݨ آلے ثبوت موجود ہین۔ وزیراعظم نے آپݨی حکومت دے اقتصادی تبدیلی دے منصوبے دا خاکہ پیش کیتا جیںدی بنیاد ترائے ستوناں تجارت اچ وسعت، نویں سوچ اتے آمدنی اچ ودھارے تے رکھی ڳئی اے۔ وزیراعظم واضح طور تے غزہ دے خلاف اسرائیل دی غیر انسانی فوجی کارروائی دی مذمت کریندے فوری اتے غیر مشروط جنگ بندی دا مطالبہ کیتا۔ انہاں شنگھائی تعاون تنظیم دے رُکن ملک ایران تے حملے دی مذمت کیتی۔ افغانستان اچ عدم استحکام نال شنگھائی تعاون تنظیم دے پورے خطے دی ترقی تے پَووݨ آلے منفی اثرات دا ݙسیندے وزیراعظم شہباز شریف افغانستان نال بامعنی انداز اچ گالھ مہاڑ تے زور ݙتا۔ وزیراعظم شنگھائی تعاون تنظیم دے علاقائی رابطیاں اتے اقتصادی انضمام دے ویژن کوں سراہندے پاکستان دے تزویراتی جغرافیائی محل وقوع کوں پورے شنگھائی تعاون تنظیم دے خطے کیتے ہک مثالی تجارتی اتے ٹرانزٹ مرکز دے طور تے اڳونہا کیتا۔ انہاں پاک چین اقتصادی راہداری کوں بین العلاقائی اقتصادی اتے تجارتی انضمام دے حصول کیتے ہک اہم اقدام قرار ݙتا۔ بیان دے مطابق سی ایچ ایس اہم علاقائی اتے بین الاقوامی سٹریٹجک سیاسی، سلامتی اتے معاشی مسلیاں، چیلنجاں اتے پیشرفت تے الایا۔ کونسل تعاون دے مختلف شعبیاں اچ ٻہوں سارے فیصلیاں اتے بیاناں دی منظوری ݙتی۔ سی ایچ ایس اچ منظور کیتے ڳئے تیانجن اعلامیہ اچ اہم علاقائی اتے عالمی امور تے شنگھائی تعاون تنظیم دی اڳواݨی دے خیالاں دا خاکہ پیش کیتا ڳیا اتے ایس سی او ملکاں وچال تعاون دے حوالے نال اقدامات دا خیرمقدم کیتا۔ اعلامیہ اچ کثیر الجہتی تجارتی نظام، مصنوعی ذہانت، سائنسی، تکنیکی اتے نویں سوچ دے تعاون کوں مضبوط بݨاوݨ، گرین انڈسٹری کیتے تعاون ودھاوݨ تے زور ݙتا ڳیا اتے شنگھائی تعاون تنظیم دے ݙو نویں مستقل اداریاں، ماسکو اچ یونیورسل سینٹر اتے دوشنبے اچ انسداد منشیات مرکز دے قیام سودھا ݙو مختلف معاہدیاں تے دستخط کیتے ڳئے۔ کونسل اقتصادی اتے سلامتی دے شعبیاں اچ جاری تعاون کیتے مختلف منصوبیاں اتے حکمت عملیاں دی وی منظوری ݙتی۔ اجلاس اچ 2035 تئیں شنگھائی تعاون تنظیم دی ترقیاتی حکمت عملی وی اپنائی ڳئی۔ بیان اچ ݙسایا ڳیا جو وزیراعظم شنگھائی تعاون تنظیم دے نویں ڈائیلاگ پارٹنر دے طور تے لائو پیپلز ڈیموکریٹک ریپبلک دا خیرمقدم کیتا۔ انہاں صدر شی جن پنگ دے گلوبل گورننس انیشی ایٹو دا وی خیرمقدم کیتا اتے گزریل ہک سال دے دوران شنگھائی تعاون تنظیم دی قابل چینی صدارت کوں سراہیا۔ سربراہی اجلاساں دے موقع تے وزیراعظم شنگھائی تعاون تنظیم دے رُکن ملکاں دے صدور اتے ڈائیلاگ پارٹنر ملکاں نال اہم ݙو پاسہ ملاقاتاں کیتیاں جنہاں اچ آپسی دلچسپی دے امور اتے سیاسی، اقتصادی اتے تجارتی تعلقات کوں ٻیا تکڑا کرݨ تے ڳالھ مہار تھئی۔ سی ایچ ایس شنگھائی تعاون تنظیم اچ فیصلہ سازی دا ساریاں توں وݙا فورم اے ڄیڑھا تنظیم کوں سٹریٹجک، سیاسی اتے سکیورٹی سمت ݙیندے۔ شنگھائی تعاون تنظیم سی ایچ ایس اعلامیاں، بیاناں اتے اہم فیصلیاں دی منظوری ݙیندے۔
