راولپنڈی۔1ستمبر(اے پی پی)پاک فضائیہ دے سربراہ ائیر چیف مارشل ظہیر احمد بابر سدھو بحرین نال ݙو پاسہ فوجی تعاون خاص کر سانجھی تربیت اتے علم دے تبادلے دے شعبیاں اچ ودھ تعاون دا عزم دوہرائے۔ آئی ایس پی آر موجب پاک فضائیہ دے سربراہ ائیر چیف مارشل ظہیر احمد بابر سدھو نال بحرین ڈیفنس فورس دے چیف آف سٹاف لیفٹیننٹ جنرل تھیاب صقر عبداللہ النعیمی ائیر ہیڈ کوارٹرز اسلام آباد دے دورے ویلھے ملاقات کیتی۔ ملاقات اچ آپسی دلچسپی دے کلیدی شعبیاں اتے ݙوہاں ملکاں وچال تعاون ودھاوݨ دیاں راہواں ڳولݨ تے الایا ڳیا۔ فریقین رل تے سانجھی تربیت اتے اجتماعی ترقی تے زور ݙیندے فوجی سطح تے تعلقات برقرار تے اتفاق کیتے۔ ائیر چیف آکھیا جو پاکستان اتے بحرین دے ڳھاٹے مذہبی اتے تاریخی تعلقات ہین جیڑھے ݙوہاں ملکاں وچال مثالی فوجی تعلقات توں ظاہر تھیندن۔ انہاں زور ݙتا جو پاکستان بحرین نال آپݨے مضبوط سفارتی اتے دفاعی تعلقات کوں قدر نال ݙیہدے ڄیڑھے علاقائی امن، سلامتی اتے استحکام سانڳے ݙوہاں ملکاں دے سانجھے عزم اتے مضبوطی نال قائم ہن۔ معزز مہمان پاک فضائیہ دے اہلکاراں دی پیشہ ورانہ مہارت دی تعریف کیتی اتے پاک فضائیہ ولوں خاص کر ملکی اتے تکنیکی ترقی دی تعریف کیتی۔ بحرین ایئر فورس دی آپریشنل تیاری کوں ودھاوݨ کیتے کثیر جہتی آپریشنز اچ علم دی سانجھ دی اہمیت تے الیندے انہاں پاک فضائیہ دے بھرپور آپریشنل تجربے توں سِکھݨ دے مقصد دے نال ملٹی ڈومین وارفیئر دے مکمل طریقہ کار بارے سنڄاݨ ڳھنݨ دی خواہش ݙسی۔ انہاں بحرین دے پائلٹاں اتے انجینئراں کیتے ساریاں سطحاں تے سانجھے تربیتی پروگرام شروع کرݨ دا وی آکھیا۔ معزز مہمان نیشنل آئی ایس آر اتے انٹیگریٹڈ ایئر آپریشن سینٹر اتے پی اے ایف سائبر کمانڈ دا دورہ کیتا جتھاں انہاں کوں پاک فضائیہ دیاں آپریشنل صلاحیتاں بارے بریفنگ ݙتی ڳئی۔ چیف آف دی ایئر سٹاف اتے چیف آف سٹاف بحرین ڈیفنس فورس وچال تھیوݨ آلی اے ملاقات ݙوہاں ملکاں دی فوجی شراکت داری کوں مضبوط بݨاوݨ، تعاون کوں ودھاوݨ اتے مضبوط تعلقات کوں ودھاوݨ دے عزم دی نشاندہی کریندی اے۔ معزز مہمان دے آوݨ تے پاک فضائیہ دے چاق و چوبند دستے لیفٹیننٹ جنرل تھیاب صقر عبداللہ النعیمی کوں گارڈ آف آنر پیش کیتا۔
