کراچی: یکم ستمبر (اے پی پی)سندھ مدرستہ الاسلام یونیورسٹی دا 141 واں یوم تاسیس منایا ڳیا۔ سندھ دیاں یونیورسٹیاں دے پرو چانسلر/صوبائی وزیر تعلیم سید سردار علی شاہ آکھیے جو “سندھ مدرستہ الاسلام برطانوی حکمراناں نئیں ٻھل سندھ دے مقامی لوکاں قائم کیتا ہئی، ساکون انہان ھیروز کون سنڄاݨݨا چاہیدے جنہاں نوآبادیاتی دور اچ جدید تعلیمی ادارے قائم کیتے جیویں حسن علی آفندی، جنہاں ایس ایم آئی قائم کیتا، ڈاکٹر نور محمد لاکھیر نور محمد اسکول حیدرآباد دے بانی ہن، ٹنڈوباگو اسکول دے بانی میر غلام محمد تالپور اتے مدرسہ اسکول نوشہروفیروز دے بانی الہندو شاہ ہن۔“ سندھ مدرستہ الاسلام دے 141 ویں یوم تاسیس دی تقریب نال خطاب کریندے سید سردار علی شاہ آکھیا جو “خان بہادر حسن علی آفندی کوئی سردار یا جاگیردار نا ہن ٻھل انہاں کراچی اچ ہک جدید تعلیمی ادارہ قائم کیتا جتھوں قائداعظم محمد علی جناح، سر شاہنواز بھٹو، سر عبداللہ ہارون، ڈاکٹر عمر بن محمد دائودپوتہ اتے ݙوجھیاں ابتدائی تعلیم حاصل کیتی۔ سندھ دیاں یونیورسٹیاں دے پرو چانسلر سید سردار علی شاہ آکھیا جو صوبے دیاں 68 یونیورسٹیاں اچوں 30 یونیورسٹیاں پبلک سیکٹر اچ کم کریندیاں پئن، ایں سانڳے او انہاں توں قیمتی تحقیقی کم دی امید رکھدن، جݙاں زرعی یونیورسٹی کہیں فصل دا نواں بیج ایجاد کریسی اتے کوئی میڈیکل یونیورسٹی ہک نویں ویکسین تیار کریسی تاں انہاں دا او کم دنیا کوں ݙکھاوݨ دے قابل ہوسی۔ صوبائی وزیر آکھیا جو ایس ایم آئی یونیورسٹی ہک نویں یونیورسٹی اے، ٻھل معیاری تعلیم اچ ایںدا کردار قابل ذکر اے۔ انہاں آکھیا جو یونیورسٹیاں کوں پراݨا نصاب نئیں پڑھاوݨا چاہیدا ٻھل او ایندا جائزہ گھن تے سائنس دے شعبے دی تازہ ترین پیشرفت کوں ایںدے اچ شامل کریندیں ہوئیں ہک جدید نصاب بݨاون، حکومت سندھ دا محکمہ تعلیم و خواندگی وی اسکولاں اتے کالجاں دے نویں نصاب تے کم کریندا پئے اتے ایکوں اجوکے دور دے حقائق دے مطابق ٻݨیدا پئے۔ صوبائی وزیر تعلیم آکھیا جو “حکومت سندھ، سندھ مدرستہ الاسلام یونیورسٹی دی ترقی کیتے ہر ممکن تعاون کریسی۔ ایس ایم آئی یو دے وائس چانسلر ڈاکٹر مجیب صحرائی آکھیا جو “سندھ مدرستہ الاسلام دے بانی خان بہادر حسن علی آفندی اساݙے ہیرو ہن، انہاں اتھو دے انگریزاں دے دور حکومت اچ بہوں اوکھے حالات اچ سندھ مدرستہ الاسلام قائم کیتا، جیندا مقصد مسلمان ٻالاں کوں جدید تعلیم ݙیوݨا ہئی، ساکوں اڄ انہاں کوں خراج تحسین پیش کرݨا چاہیدے۔ ڈاکٹر صحرائی خان بہادر حسن علی آفندی دی سوانح عمری دی کتاب دا حوالہ وی ݙتا۔ انہاں اعلان کیتا جو حسن علی آفندی چیئر وی قائم کیتی ویسی۔ انہاں ایس ایم آئی یو ماڈل اسکول کوں علیحدہ بجٹ فراہم کرݨ تے وزیر اعلیٰ سندھ سید مراد علی شاہ اتے سید سردار علی شاہ دا شکریہ ادا کیتا۔ ڈاکٹر مجیب صحرائی آکھیا جݙاں او پنج سال پہلے ایس ایم آئی یو اچ شامل تھئے ہن تاں انہاں طلباء دی آبادی ودھاوݨ، ریسرچ کلچر کوں مضبوط کرݨ اتے ایس ایم آئی یو کوں نان ڈیفسیٹ ادارہ بݨاوݨ دی کوشش کیتی اتے انہاں ایہو ڄھیں اہداف پورے کیتن۔ معروف ماہر تعلیم سید جعفر احمد وی حسن علی آفندی دی خدمات کوں خراج تحسین پیش کیتا جو انہاں آپݨے قائم کیتے ڳئے تعلیمی اداریاں دے ذریعے معاشرے دے سماجی و سیاسی حالات کوں بدل ݙتے۔ ڈاکٹر سبھاش بابو، چیئرپرسن ڈیپارٹمنٹ آف سوشل اینڈ ڈیولپمنٹ اسٹڈیز، ایس ایم آئی یو ایس ایم آئی دے پراݨے طلباء معاشرے اچ تبدیلیاں دے کردار دی تعریف کیتی۔ بعد اچ سید سردار علی شاہ ڈاکٹر مجیب صحرائی، شہناز وزیر علی، اکبر لغاری اتے ݙوجھے ماہرین تعلیم دے نال مرزا قلیچ بیگ دی لکھی ہوئی حسن علی آفندی دی ترجمہ شدہ سوانح عمری اتے اسسٹنٹ پروفیسر وفا منصور برڑو دے انگریزی اچ ترجمے دا اجرا کیتا۔ ایں موقع تے شرکا شمع روشن کر تے ایس ایم آئی المنائی ایسوسی ایشن دے قیام دا وی آغاز کیتا۔ تقریب اچ مختلف یونیورسٹیاں دے وائس چانسلرز، ماہرین تعلیم، سرکاری افسراں، ایس ایم آئی یو دے ڈینز، فیکلٹی اتے طلباء نے بہوں وݙی تعداد اچ شرکت کیتی۔ مہماناں کوں سووینئرز وی پیش کیتے ڳئے
