ملتان۔ 02 ستمبر (اے پی پی) کمشنر ملتان ڈویژن عامر کریم خان آکھیا جو دریائے چناب دا سیلابی ریلہ اج شام ہیڈ محمد والا پڄݨ دا امکان اے۔ ایں ویلھے ہیڈ محمد والا تے محکمہ آبپاشی دا گیج 408 فٹ ریکارڈ کیتا ڳئے، جݙاں جو نازک سطح 417 فٹ اے۔ انہاں تفصیل ݙسیندیں ہوئیں آکھیا جو اگر پاݨی نازک سطح تے ویسی تاں فوری ایکشن پلان تے عمل درآمد کیتا ویسی۔ کمشنر ݙسایا جو ہیڈ تریمو توں پاݨی دا اخراج سست روی دا شکار اے، جئیں دے باعث صورتحال پریشان کُن اے۔ ہیڈ محمد والا تے ٹریفک کوں مکمل طور تے بلاک کر ݙتا ڳئے تاں جو حفاظتی اقدامات اچ رکاوٹ نہ آوے۔ ڈائنامائٹ دی تنصیب دا عمل جاری اے جئیں کیتے 18 گھنٹے درکار ہن۔ انہاں آکھیا جو ماہراں دی ٹیکنیکل کمیٹی سیلابی ریلے دی شدت، رفتار اتے ݙوجھے عاملاں کوں سامݨے رکھیندیں ہوئیں بریچنگ دا فیصلہ کریسی۔ عامر کریم خان آکھیا جو ہݨ تئیں ساݙھے پنڄ لکھ توں ودھ لوک اتے پنڄ لکھ توں زیادہ مال مویشی سیلابی علاقیاں توں محفوظ علاقیاں اچ منتقل کیتے ڳئن۔ وزیر اعلیٰ پنجاب مریم نواز دی ہدایت تے ڈویژن اچ قائم 90 فلڈ ریلیف کیمپ مکمل طور تے فعال ہن اتے متاثرین کوں خوراک، دوائیاں اتے ݙوجھی سہولتاں فراہم کیتی ویندی پئن۔ انہاں آکھیا جو آبادی کوں بچاوݨ کیتے ہنگامی اقدامات ݙین٘ھ رات جاری ہن۔
