بیجنگ۔2ستمبر (اے پی پی) پاکستان اتے چین سٹریٹیجک سانجھے داری کوں ٻیا مضبوط بݨاوݨ کیتے آپݨے سانجھے عزم دا اعادہ کریندیں ہوئیں ݙو پاسہ تعاون کوں ٻیا ودھاوݨ تے اتفاق کیتے، وزیراعظم محمد شہباز شریف آکھیا جو پاکستان ترقی دے عظیم سفر اچ چین دے نال رَل تے کم کرݨ کیتے تیار اے جݙاں جو صدر شی جن پنگ آکھیا جو سی پیک آپݨے ݙوجھے مرحلے اچ داخل تھی ڳئے، چین اقتصادی ترقی دے سارے شعبیاں اچ پاکستان دی مدد جاری رکھیسی۔ منگل کوں وزیراعظم آفس دے میڈیا ونگ ولوں جاری بیان موجب وزیراعظم محمد شہباز شریف بیجنگ دے عظیم عوامی ہال اچ عوامی جمہوریہ چین دے صدر شی جن پنگ نال ملاقات کیتی۔ بیان دے مطابق بہوں خوشگوار ماحول اچ تھیوݨ آلی ملاقات اچ ݙوہاں رہنماواں پاکستان اتے چین دے وچال آپݨی مضبوط اتے ویلھے دی ہر آزمائش تے پورا لہݨ آلی، سٹریٹیجک تعاون تے مبنی شراکت داری کوں مزید مضبوط بݨاوݨ کیتے آپݨے سانجھے عزم دا اعادہ کیتا۔ وزیراعظم تیانجن اچ شنگھائی تعاون تنظیم دے سربراہان مملکت دے اجلاس دے کامیاب انعقاد تے صدر شی جن پنگ کوں مبارکباد ݙتی اتے فسطائیت دے خلاف جنگ اچ عظیم فتح دی 80 ویں سالگرہ دے موقع تے انہاں کوں مبارکباد ݙتی۔ صدر شی جن پنگ دی دور اندیش اڳواݨی، جئیں دی بدولت چین جدیدیت اتے ترقی دی منزلاں طے کیتیاں، کوں سراہندیں ہوئیں وزیراعظم آکھیا جو پاکستان کوں چین دی کامیابیاں تے بہوں فخر اے اتے او ایں عظیم پندھ اچ چین دے نال رَل تے کم کرݨ کیتے ہمیشہ تیار اے۔ وزیراعظم پاکستان دی علاقائی سالمیت، خودمختاری اتے سماجی تے اقتصادی ترقی کیتے چین دی غیر متزلزل حمایت کوں سراہیا۔ انہاں صدر شی جن پنگ دے بیلٹ اینڈ روڈ انیشی ایٹو (بی آر آئی) دے ہک اہم منصوبے دے طور تے چین-پاکستان اقتصادی راہداری (سی پیک) دی اہمیت کوں سراہیا اتے سی پیک دے اڳلے مرحلے، جئیں اچ پنڄ ٻئی راہداریاں دا اضافہ کیتا ڳئے، دے کامیاب نفاذ کیتے چین دے نال رَل تے کم جاری رکھݨ دی خواہش دا اعادہ کیتا۔ انہاں اقدامات نال ݙوہاں ملکاں کوں ہک سانجھے مستقبل کیتے پاکستان چین کمیونٹی کوں مضبوط بݨاوݨ اچ مدد مِلسی۔ وزیراعظم بہوں پاسہ نظام کوں مضبوط بݨاوݨ کیتے صدر شی جن پنگ دے پکے عزم کوں سراہندیں ہوئیں آکھیا جو پاکستان صدر شی جن پنگ دے تاریخی اقدامات، جیں اچ گلوبل گورننس انیشی ایٹو، گلوبل ڈویلپمنٹ انیشی ایٹو، گلوبل سیکیورٹی انیشی ایٹو اتے گلوبل سولائزیشن انیشی ایٹو شامل ہن، دی مکمل حمایت کریندے۔ وزیراعظم آکھیا جو اے اقدامات اجتماعی عالمی بھلائی کیتے ضروری ہن اتے علاقائی اتے عالمی امن، استحکام اتے ترقی اچ مددگار ثابت تھیسن۔ صدر شی جن پنگ آکھیا جو چین اقتصادی ترقی دے سارے شعبیاں اچ پاکستان دی مدد جاری رکھیسی، خاص کر ایہو جیہی صورتحال اچ جݙاں سی پیک آپݨے ݙوجھے مرحلے اچ داخل تھی ڳئے اتے ایں دے تحت پاکستان دے اہم ترین اقتصادی شعبیاں تے توجہ مرکوز کیتی ویندی پئی اے۔ ݙوہاں رہنماواں پاکستان اتے چین دے وچال منفرد اتے بے مثال تعلقات تے اطمینان دا اظہار کریندیں ہوئیں اتفاق کیتا جو ایں دی عکاسی ݙو پاسہ تعاون کوں مزید ودھاوݨ دے ذریعے تھیوݨی چاہیدی اے۔ ݙوہاں رہنماواں اہم علاقائی اتے عالمی پیشرفت تے تبادلہ خیال کریندیں ہوئیں پاکستان اتے چین وچال قریبی تعاون جاری رکھݨ تے وی اتفاق کیتا۔ وزیراعظم صدر شی جن پنگ کوں آوݨ آلے سال پاک-چین دوستی دی 75 ویں سالگرہ دے موقع تے پاکستان دا سرکاری دورہ کرݨ کیتے آپݨی بہوں سچّی دعوت دی وی تجدید کیتی۔
