چاچڑاں دے مقام تے بے نظیر پُل کوں سیلاب توں کوئی خطرہ نئیں، اے ڈی سی جی رحیم یار خان

رحیم یار خان۔ 02 ستمبر (اے پی پی) دریائے سندھ اچ چاچڑاں شریف توں 3 لکھ 31 ہزار کیوسک دا ریلہ لنگھدا پئے، 5 ستمبر تئیں 9 توں 11 لکھ کیوسک دا سیلابی ریلہ چاچڑاں دے مقام تے پڄسی۔ اے ڈی سی جی آکھیا جو پاک فوج، انتظامیہ، پولیس، ریسکیو سودھے سارے ادارے الرٹ ہن، ضلعے بھر اچ فلڈ ایمرجنسی نافذ کر تے سارے اداریاں دی چھٹیاں منسوخ کر ݙتی گئن، سارے ہسپتالاں اچ ایمرجنسی نافذ اے، سیلابی ریلہ آوݨ توں پہلے لوکاں دے انخلاء کیتے انتظامات مکمل کر ڳھدے ڳئن، 26725 لوکاں کوں بحفاظت ریسکیو کر تے محفوظ علاقیاں اچ منتقل کر ݙتا ڳئے، 37970 دے نیڑے مال مویشیاں کوں محفوظ کر ڳھدا ڳئے۔ عرفان انور ݙسایا جو روزانہ دی بنیاد تے اعلانات کیتے ویندے پئے ہن تاں جو لوک محفوظ علاقیاں تے پڄ ون٘ڄن، 10 بوٹنگ کیمپس، ریسکیو دی 18 اتے پرائیویٹ 20 اتے پولیس دے کول 10 کشتیاں موجود ہن، چاریں تحصیلاں اچ 12 ریسکیو اینڈ ریلیف کیمپس قائم کر ݙتے گئن، سارے کیمپس اچ صحت، لائیو سٹاک، سپرے، اتے ساری دوائیاں اتے خوراک موجود اے، کجھ ݙین٘ہ پہلے 5 لکھ کیوسک توں ودھ پاݨی دا سیلابی ریلہ لنگھیا جئیں دے باعث 29 ڳوٹھ پاݨی دے ہیٹھ آئے۔ اے ڈی سی جی آکھیا جو متاثرہ علاقیاں اچ ریسکیو اینڈ ریلیف آپریشن دے ذریعے لوکاں کوں محفوظ کر ڳھدا ڳئے، کوئی جانی نقصان نئیں تھیا، سیلابی صورتحال کوں سامݨے رکھ تے حفاظتی منچن بند کوں مکمل طور تے مانیٹر کیتا ویندا پئے، بے نظیر شہید پُل کوں سیلابی صورتحال توں خطرہ کائنی، پُل دے ہیٹھلے حصے اچ سیلابی پاݨی دے بہاؤ اچ روانی کیتے اقدامات کیتے ویندے پئن۔