وزیراعظم شہباز شریف اتے تاجک صدر امام علی رحمان دی ملاقات، تجارت، سرمایہ کاری، توانائی، علاقائی سلامتی، ثقافت سودھے مختلف شعبیاں اچ تعاون کوں ودھاوݨ تے اتفاق

بیجنگ۔2ستمبر (اے پی پی) وزیراعظم محمد شہباز شریف اتے تاجکستان دے صدر امام علی رحمان تجارت، سرمایہ کاری، توانائی، علاقائی سلامتی، ثقافت، رابطیاں اتے لوکاں دی سطح تے تعاون کوں ودھارا ݙیوݨ تے اتفاق کیتے۔ منگل کوں وزیراعظم آفس دے میڈیا ونگ ولوں جاری بیان دے مطابق وزیر اعظم محمد شہباز شریف تاجکستان دے صدر امام علی رحمان نال چین دے دارالحکومت بیجنگ اچ ملاقات کیتی۔ ݙوہاں رہنماواں پاکستان اتے تاجکستان وچال آپسی دلچسپی دے سارے شعبیاں اچ جاری تعاون تے اطمینان دا اظہار کیتا اتے تجارت اتے سرمایہ کاری، رابطے، توانائی، علاقائی سلامتی، ثقافت اتے لوکاں دی سطح تے تبادلیاں سودھے مختلف شعبیاں اچ تعاون ودھاوݨ تے اتفاق کیتا۔ ݙوہاں رہنماواں سانجھے ثقافتی، تاریخی اتے مذہبی رشتیاں اچ جُڑے بھرا مسلمان ملکاں پاکستان اتے تاجکستان وچال تعلقات کوں ٻیا مضبوط بݨاوݨ دے عزم دا اعادہ کیتا اتے سانجھی اہمیت دے علاقائی اتے عالمی مسلیاں تے وی ڳالھ مہاڑ کیتی۔