بیجنگ۔2ستمبر(اے پی پی)وزیر اعظم محمد شہباز شریف آکھیے جو “این ایچ اے اتے وزارت توانائی سیلاب متاثرہ نظام مواصلات اتے بجلی دی ترسیل دے نظام دی ترجیحی بنیاداں تے بحالی کیتے اقدامات کرن، سیلاب پاروں لاپتہ تھیوݨ آلے شہریاں کوں تیکھے ڳولیا ونڄے۔ بیجنگ اچ وزیر اعظم کڄھ ویلھے کیتے آپݨیاں مصروفیت چھوڑ تے سیلاب متاثرہ علاقیاں دی صورتحال بارے جائزہ اجلاس دی اڳواݨی کیتی۔ وزیر اعظم ہدایت کیتی جو سیلاب توں متاثرہ علاقیاں دی بحالی کیتے وفاقی حکومت، صوبائی حکومتاں اتے سارے متعلقہ ادارے ہک ݙوجھے نال رل تے کم تعاون اتے کم جاری رکھن۔ وزیراعظم ملک اچ جاری مون سون دے وݙے سپیل دے دوران این ڈی ایم اے اتے ݙوجھے ریسکیو و ریلیف اداریاں دی تیاری اتے امدادی کارروائیاں دی نگرانی کیتے آپݨی مصروفیات کڄھ ویلھے کیتے چھوڑ ݙتین۔ اجلاس اچ چیئرمین این ڈی ایم اے، پنجاب، سندھ اتے خیبر پختونخوا دے چیف سیکرٹریز اتے امدادی کارروائیاں کیتے متعلقہ اداریاں وزیراعظم کوں ملک اچ تازہ سیلابی صورتحال اتے امدادی کارروائیاں تے بریفنگ ݙتی۔ وزیراعظم این ایچ اے اتے وزارت توانائی کوں سیلاب متاثرہ نظام مواصلات اتے بجلی دی ترسیل دے نظام دی ترجیحی بنیاداں تے بحالی کیتے اقدامات چاوݨ دی ہدایت کیتی۔ وزیراعظم دوران اجلاس سیلاب متاثرہ خانداناں دی امداد، انہاں دی محفوظ علاقیاں تے منتقلی اتے متاثرہ انفراسٹرکچر دی بحالی کیتے وفاقی حکومت، صوبائی حکومتاں اتے سارے متعلقہ اداریاں کوں مکمل تعاون نال کم جاری رکھݨ دی ہدایت کیتی۔ انہاں متعلقہ حکام کوں پنجاب اتے سندھ اچ سیلابی صورتحال کوں سامݨے رکھ تے بحالی اتے امدادی کارروائیاں تے خصوصی طور تے توجہ ݙیوݨ، چیئرمین این ڈی ایم اے کوں صوبائی ڈیزاسٹر مینجمنٹ اتھارٹیز نال مکمل رابطے اچ رہݨ اتے صوبائی حکومتاں کوں ہر طرح دی معاونت ݙیوݨ اتے سیلاب پاروں لاپتہ شہریاں دی تیکھی تلاش مکمل کرݨ دی ہدایت کیتی۔ وزیراعظم کوں ݙسایا ڳیا جو دریائے راوی، چناب اتے ستلج اچ طغیانی دی مسلسل نگرانی کیتی ویندی پئی اے، دریاواں اچ طغیانی کوں سامݨے رکھ تے ڈیمز اتے بیراجاں دی ریگولیشن جاری اے۔ اجلاس اچ پنجاب اتے سندھ اچ دریاواں اچ طغیانی نال ودھدی سیلابی صورتحال دا وی ݙسایا ڳیا جو دریائے چناب، راوی اتے ستلج اچ تریموں، بلوکی، سدھنائی، جی ایس والا اتے سلیمانکی تے طغیانی اتے متوقع سیلابی صورتحال نال نبڑݨ کیتے این ڈی ایم اے دا صوبائی انتظامیہ اتے صوبائی ڈیزاسٹر مینجمنٹ نال مکمل تعاون جاری اے۔ دریائے راوی، چناب اتے ستلج توں سیلابی ریلیاں دی آمد دے بعد پنجند دے مقام تے شدید طغیانی متوقع اے، پنجند توں اے ریلہ 6 ستمبر دی ݙوپہر تئیں گڈو بیراج پڄݨ دا امکان اے جتھاں متوقع سیلابی صورتحال دی کڑی نگرانی کیتی ویندی پئی اے۔ سندھ اچ گڈو دے مقام تے متوقع سیلابی ریلے کوں سامݨے رکھ تے این ڈی ایم اے سندھ حکومت دے نال مناسب انتظامات کیتے مکمل تعاون کریندا پئے۔ سیلاب توں متاثرہ علاقیاں اچ ریسکیو 1122، پاک فوج، رینجرز، غیر سرکاری تنظیماں اتے صوبائی ڈیزاسٹر مینجمنٹ اتھارٹیاں آپسی تعاون نال امدادی کارروائیاں کرینداں پین۔ سیلاب متاثرہ علاقیاں اچ امدادی سامان دے قافلے تسلسل نال بھیڄیے ویندے پئن۔ سیلاب متاثرہ علاقیاں اچ بجلی دی ترسیل اتے بجلی دے متاثرہ نظام دی بحالی دا کم تیزی نال جاری اے۔ اجلاس اچ نائب وزیراعظم و وزیر خارجہ محمد اسحاق ڈار، وزیر داخلہ سید محسن رضا نقوی، وفاقی وزیر اطلاعات و نشریات عطا اللہ تارڑ جݙاں جو چیئرمین این ڈی ایم اے اتے متعلقہ اداریاں دے اعلیٰ افسران ویڈیو لنک دے ذریعے شریک ہن
